１０年１２月０７日　星期二

開心既時間真係過得快，眨眨眼又係呢個大吃大喝之行既最後一日。不過今晚都係晚機，所以都仲可以出去玩。第一餐都係西門町，食左八方雲集，係香港都冇食，嚟到台灣第一次食，幾好味呀！之後就出發去貓空啦！坐到去動物園站，可能今日係星期二，冇咩人，亦唔使點排隊，只係要坐水晶車先要等，亞莎同大口唔等就坐普通車。好高呀！仲好凍添呀！今日既氣溫比尋日低左成１０度，亞莎同大口都傻傻地咁去到貓空站！個度有好多美食廣場，又走左去食野。亞莎只係飲杯熱野就ＯＫ啦。

係貓空站附近行左一陣就走了，返落去就再向亞莎好想去既袖珍博物館進發！今次書係冇既，所以亞莎都係自己上網搵個地址，再係地圖上面睇睇睇！比亞莎搵到大約係邊呀！出到地車站再睇地圖，搵到呀！大口話亞莎一入去就兩眼發光呀！哈哈∼好開心！睇完都差唔多要返酒店啦，拎埋行李就差唔多要去機場啦！一早叫左酒店幫手叫左飛狗，不過飛狗遲到呀。但係亞莎同大口都預多左時間，所以唔怕，去到都只係７點鐘。而且亞莎一早係網上 check 左 in，唔怕冇位坐（即係唔使分開坐），搞掂哂，就去食台北既最後一餐！哈哈∼∼去左間叫寶島晶華，都唔錯呀，大食一餐再睇多一陣野就入去了。入到去見到好多 Hello Mimi 呀！亞莎影左尐比露比睇呢，嘻嘻∼∼好啦，夠鐘啦，再見了台北，下次見啦！

【4日3夜台北大吃大喝之旅】

Categories: 【ToDay'S SpEcIaL】, 201012 台北肚爆自由行
No Comments »

１０年１２月０６日　星期一

尋晚發夢要返工呀∼∼∼起身亞莎先發現自己係台北呀！哈哈∼∼

今日打算係市中心行下。去左 １０１個尐，不過行到去 New York New York 先發現冇左！囧∼∼天呀！唔怕都有好多好地方行下既。入夜之後就去左美麗華個邊，之後去美麗華都要坐巴士，而家已經有捷運站啦，行到去，好方便。不過去美麗華之前，亞莎同大口先去左伍角船板食飯，個個都話好靚一定要去喎！好就去啦。真係好靚呀！好似入左宮崎駿既漫畫世界咁呀！ 

食飽再行去美麗華坐摩天輪，未同大口坐過呀，所以拉左大口上去坐，哈哈∼∼坐完仲有 coupon 食雪糕添呀！好開心呀∼∼∼

Categories: 【ToDay'S SpEcIaL】, 201012 台北肚爆自由行
No Comments »

１０年１２月０５日　星期日

今日瞓飽先起身出去，當然又係食食食啦！大口話唔肚餓，所以去到淡水先食啦！行行行，行到老街就食野啦，咪講笑！不停食，又慢慢行下睇下。食左個大大雪糕添呀！大口未食過呢！又買左木板明信片寄去比朋友，大口又冇見過呀！之後仲一人買左一個小笛添呢！哈哈∼∼∼ 

沿住老街慢慢行，向住漁人碼頭方向進法，黃金海岸線都真係幾靚架，不過行到一半唔對路，中途跳上架巴士再向漁人碼頭進發！去到開始黃昏啦，可以係漁人碼頭情人橋上面睇日落呢。又食左亞給同魚丸湯！嘻嘻∼∼∼睇完日落亞莎佢地又坐巴士返淡水站，再返台北又食過。先返酒店放抵尐野，行出西門町比大口見到間鞦韆餐廳，上左去食，所有櫈都係鞦韆嚟架。好得意呢！尐野食都唔差架。食完亞莎佢地行左去紅樓，上一次亞莎嚟都冇入到去，今次入去睇到尐小小藝術品，好得意架。要來紅樓出面有好多間 bar 添，亞莎佢地都坐左一陣，不過亞莎發現好似想落雨，由外面搬左入室內，點知搬完都唔夠兩分鐘就倒水啦！真係快人一歲理想達到呀！

Categories: 【ToDay'S SpEcIaL】, 201012 台北肚爆自由行
No Comments »

１０年１２月４日　星期六

是日５：００起身！因為亞莎同大口要６點去到機場呀！大口５：４５打比亞莎同亞莎講落嚟啦（Call 車嘛），亞莎就落樓啦！機場，亞莎嚟啦！

去到機場都只係６點多，天都未光！快快去 check in 先，點知亞莎同大口都唔記得左有 online check in 呢會事，所以爆哂要分開坐呀！算啦，都好快啫，大口話上去同人換睇下有冇得換喎！之後當然去嘆左杯咖啡（亞莎係古力啦），等下等下就差唔多可以入去啦。飛機都好準時呀，８：２０真係飛啦，去到都只係９點多。亞莎同大口兩個都唔使簽證既，所以容易就入左去啦。

學龜姬話齋，飛落海真係係台灣等亞莎呀！哈哈∼∼一入境就見到佢地四個既紙板人！之後亞莎諗住出去會見到ＣＫ啦，點知聽到大堂廣播叫亞莎，原來宇希唔小心食左蠟筆呀，所以ＣＫ冇辦法嚟接亞莎，唔緊要，亞莎自己去坐飛狗啦！反正都送到去酒店。去到酒店未有得入住，先放抵行李就過對面西門町醫肚先！大口話要食牛肉麵，好啦就去食麵啦！去左三多商店食一人一碗麵，食食下ＣＫ就打比亞莎話宇希冇事啦，可以嚟帶亞莎去玩啦！真係麻煩哂呢！ＣＫ嚟到就車亞莎佢地上去九份，咁就唔使自己坐火車再轉車呢！一入到九份做咩？咪又係食囉！食左肉丸，麵，海帶，蛋，再嚟芋圓，有個唔記得叫咩，但係好好味既薄餐包雪糕，黑橋牌肉腸，仲有黑糖糕，果子，個肚都爆咁滯呀！再去左嘆茶，亞莎飲左個水果茶，好好味呀！係超好味呀！ 

之後都入夜了，ＣＫ車番亞莎佢地落台北，再帶亞莎去買手信（朋友既指定手信，唔帶亞莎去亞莎都唔知係邊呀！），再係小販檔食雞排，魷魚同甜不辣！飽呀！ＣＫ車左亞莎佢地返酒店就返屋企啦！麻煩哂ＣＫ一家呢！之後亞莎同大口再出去，去左雙城街（嚇親人），再去左 LUXY！亞莎好勁呀，明明要訂位都比亞莎講到可以入去呀！哈哈∼∼玩左一晚再係街邊食多兩個宵夜先返酒店！沖完涼出嚟亞莎同大口兩個都攰到不能，要 zzz ZZZZZ 啦∼∼∼

Categories: 【ToDay'S SpEcIaL】, 201012 台北肚爆自由行
No Comments »