Archive for the '201006 高雄墾丁優悠行' category

【墾丁 – 香港】

 | June 28, 2010 23:59

10年6月28日 星期一

開心時間過得特別快,話咁快亞莎又返嚟啦,返列嚟再寫遊記呀吓∼∼∼

今日起身,張媽媽(民宿老闆)為亞莎佢地準備好早餐,新鮮熱辣既捧過嚟,真係好貼心!有機會亞莎返嚟墾丁都一定要住呢度同埋搵阿輝哥!阿輝哥準時9點係亞莎佢地既屋外等,執好行李,上車出發啦!第一站就係船帆石,船帆石對亞莎嚟講冇咩特別,不過特別既地方係,睇船帆石既地方,就係「天氣晴」既屋企呀!天氣晴呀∼∼∼亞莎好鍾意架!亦都係咁亞莎好鍾意墾丁呢一度呀!之後朋友想去砂島,阿輝哥車左亞莎佢地去,不過個度已經係一個保護區,所以唔可以行落去架,但係就有個展示廳,都可以摸到砂島既貝殼沙架!仲可以蓋個印添!亞莎尋晚係大街買既明信板大派用場啦!Yeah!

而下一站就係鵝鑾鼻燈塔,阿輝哥尋日等亞莎佢地既同時識左另一個司機大佬,知道有個地方入去可以唔使比錢呀,點知今日去到個度有好多人係度落貨,所以入唔去,唯有買飛入啦(其實門票都只係台幣40蚊),阿輝哥係門口等,亞莎佢地就自己行入去睇,都幾靚架!不過咁啱今日係星期一,所以燈塔唔開放(就算開放都冇得上去,因為係古蹟嚟架),所以亞莎佢地好快就出左嚟啦。之後阿輝哥就車左亞莎佢地去「台灣最南點,國境之南」啦,個度就係整個台灣島最南既地方!亞莎去過英國既最西點,而家嚟到台灣去最南點,唔知再會去邊度既最北點同最東點呢?大大個太陽高高掛好開心呀!睇完景再去左「龍磐公園」,不過呢度係墾丁睇日出既好地方,但亞莎佢地去到個時,個太陽都曬到上膊頭啦!唔緊要,一樣咁靚咁舒服!之後再經過風吹沙(就係風大到可以將崖下面既沙吹上嚟),就去到港口吊橋啦!每人比10蚊台幣(當維修費)行吊橋,之後就係橋口既「阿水衝浪店」嘆杯啤先。阿輝哥要揸車冇得飲,不過亞莎都請左佢飲支凍飲,點知就係嘆緊既時間,落狗狗!呢度落雨都冇咩先兆既!所以阿輝哥就車左亞莎佢地去睇花海,本身阿輝哥話等雨停,不過唔使啦,睇佢個樣都未停架啦,係車影算了!

再經過幾個海七既景點,就去恆春鎮既阿嘉既家(海七啦),如果想入阿嘉既家要位位50(台幣),亞莎又唔係真係咁鍾意,所以冇必要,係度蓋兩個印就OK啦!再去埋恆春郵局(阿嘉打工既地方)蓋個郵局印就完成啦!Yeah!之後本身阿輝哥帶亞莎佢地去巷子餐廳,點知咁啱得咁翹老闆去左辦貨,唯有下次啦,所以阿輝哥就帶左亞莎佢地去三年九班食午餐,都係以學校為主題既餐廳,好得意亦好好味!掂架!食完野阿輝哥就車亞莎去買手信,真係架,比尋晚大街平好好好好好多呀!因為阿輝哥竟然係帶左亞莎去批發度買囉!你話平唔平啦!哈哈∼∼之後再應亞莎既要求,去多次白沙灣,落多一次水,因為真係好舒服!今日個太陽比尋日大,浪亦同時比尋日大∼∼好舒服呀!去完白沙灣,朋友要食多次冰,亞莎想試之前台灣同事話要食既綠豆蒜,所以阿輝哥車左亞莎佢地去食「阿婆綠豆蒜」,好好味,大大兜都只係台幣35蚊咋!好味都不得了!食完,亞莎就要同墾丁講再見啦!阿輝哥就車亞莎佢地出高雄,朋友同亞莎作最後衝刺既手信時間(不過亞莎唔係買手信,係買濕紙巾)哈哈∼∼

差唔多時間啦,阿輝哥車亞莎佢地去機場,同阿輝哥道別就 check in 啦,點知∼∼Delay呀!仲Delay成兩個鐘!天呀!點解呀!雖然係咁,今個高雄墾丁之旅都係開心既!亞莎希望下年可以再去!墾丁亞莎真係好鍾意呀!

詳情:【高雄墾丁之旅 2010 Day 3

【高雄 – 墾丁】

 | June 27, 2010 23:59

10年6月27日 星期日

天氣晴,亞莎嚟啦∼∼∼

今日起身,個天放晴啦!Yeah!亞莎佢地執好野就落去食早餐,不過酒店係唔包既,所以就去左附近既一間 Coffee Shop,係尋晚行返酒店既時候發現架!真係一大發現,因為入到去個感覺就係好舒服!嘻嘻∼∼成間 Coffee Shop 都好有外國 feel,似係一個繁忙既街頭,靜靜咁嘆住咖啡(奶茶),睇下報紙、雜誌既感覺!好舒服呢!之後就返酒店 check out,準備下一站、墾丁之旅!

係酒店大堂等住阿輝哥既來臨,阿輝哥就係亞莎既包車司機,超好人架佢!經過左兩個鐘左右既車程,中途停過休息,買過超甜超新鮮既生果,全部都係阿輝哥帶亞莎佢地去食架!真係要多謝阿輝哥呀!到左墾丁啦!天氣仲放晴呀(大部份時間),好開心呢!

食完野,阿輝哥就開始帶亞莎佢地優遊墾丁啦!先車左亞莎佢地去后灣橋,如果有睇過海角七號既朋友,都知道大部份既景都係係墾丁拍架,而且亞莎有睇「我在墾丁。天氣晴」嘛,天氣晴真係好好睇架!嘻嘻!去完后灣橋,阿輝哥就帶左亞莎佢地去住半潛艇,可以睇水入面既魚魚,不過因為之前一日墾丁落大雨啦,所以水變得濁啦!而且搖得好勁,搞到亞莎同朋友都就快要嘔囉!頂唔住其唔只亞莎佢地兩個,有三個年青人第一時上左上層,亞莎都唔理啦,上左去先算!嘩,上左去好得多啦!哈∼∼成個人都舒服哂呀!

阿輝哥好貼心,知道亞莎佢地就返,開定車,開哂冷氣等亞莎佢地返嚟呀!之後下一個景點都係海七既地方,就係白沙灣啦!個度水清沙幼,超超超超超正呀!亞莎都除左拖鞋,落水玩啦!尐海水超涼快!真係好正呀!如果日日都可以望到呢一個海,真係正爆呀!之後開始落雨啦,阿輝哥車左亞莎佢地去出水口(其實因為亞莎之前問過阿輝哥,所以阿輝哥先帶亞莎佢地去),經過左出水口,見到貓鼻頭,阿輝哥就應朋友既要求,去食小杜包子!不過如果自己去小杜包子,睇怕大家要有尐耐心先好去,因為閒閒地都要等一個幾鐘架!不過亞莎佢地有阿輝哥囉喎,3分鐘就有得食啦!亞莎佢地仲係車度等,係阿輝哥幫亞莎佢地去買架!阿輝哥真係超好人呀!之後朋友話要食冰,所以阿輝哥帶左亞莎佢地去左「水吻創意冰品」,個度老闆都好好人架!聽阿輝哥既意見,兩個人叫一個好了,亞莎佢地叫左個「超級芒果冰」(唔係淨係亞莎鍾意食芒果架),超正呀!香港你都見唔到有咁大兜冰囉!好味,都只係台幣150蚊,香港食一個糖百府都唔得啦。而阿輝哥叫左「水吻」最出名既「花生沙冰」,阿輝哥仲請左亞莎佢地試添呀!真係好好味架!好似冰鎮左既花生糊再打成冰呀!好味到不得了!

之後途經亞莎佢地今晚住既民宿,拿拿聲比錢 check in 先(不過小簡哥已經幫亞莎佢地訂好左架啦),放低行李又再出去!去關山睇日落呀(加上餵蚊),去到個天開始慢慢黑,點知同時有舊大黑雲呀!點解呀!所以唔係點影到日落,不過都睇到尐架,知足既亞莎已經覺得好開心了!餵包蚊既下一站就係「山火」(係呀,出火呀,咪諗多啦你),首先阿輝哥帶左亞莎佢地係恆春鎮買左煙花先,如果去到先買既話就會比人呃架啦!果然,亞莎佢地買左個大大既煙花台幣250蚊,個度要買貴1.5倍呀!好在有阿輝哥啦!而且出火個度好黑既,冇燈,阿輝哥已經拎家手電筒(不過都唔夠光)加上亞莎既手機求救燈,掂哂!好在咋,因為短時間已經不停聽到有人慘叫,跌到,仲碌落樓梯!好可怕呀!

去到出火啦!好多人已經係個度玩煙花!亞莎佢地都有玩呀,而且亞莎仲學人拍「字」相添!人地玩,亞莎拍,哈哈∼∼∼好開心呢!不過係去「出火」之前有個小插曲,就係車一停,個天就倒水啦!大雨到冇人有呀!所以亞莎佢地先去左食飯,阿輝哥帶左亞莎佢地去食「冬粉鴨」就係粉絲啦,好好味架,不過個間野多人到不得了,個個都要等好耐呀!阿輝哥去左幫亞莎佢地問左好多次,亞莎佢地先有得食咋!哈∼∼

放完煙花,亞莎佢地先返左民宿(因為兩個都將把遮放左係喼),拎埋遮先再出去行大街!阿輝哥都話拍今晚落雨有尐檔口唔開,不過亞莎見大部份都有開呀!而且仲搵到朋友叫幫佢地買既野食店添!只係朋友叫買得太多,亞莎根本拎唔嚟,只係買左佢叫買既一半咋!不過都夠佢食啦!哈哈∼∼

本身亞莎諗住係大街買尐小手信既,之不過阿輝哥話大街會貴,叫亞莎睇定先好買,而且佢仲問家第二度有冇亞莎想搵既野,佢話有,仲一定會比大街平,所以亞莎都冇咩點買就走左啦。只係係大街買左尐小食,今晚返民宿睇波食下咁。亞莎行街阿輝哥就係車等足咁耐,真係辛苦阿輝哥啦!亞莎佢地大大話話行左成個幾兩個鐘架!哈哈∼∼∼

詳情:【高雄墾丁之旅 2010 Day 2

【香港 – 高雄】

 | June 26, 2010 23:59

10年6月26日 星期六

高雄高雄,亞莎嚟啦∼∼∼

今日一早起身,好似冇瞓過咁,唔知係耐冇旅行(其實上年11月先去完)定你咩呢,總之就係瞓唔著啦!加上尋晚一路瞓一路好大雨,仲黃雨添!天呀,點解咁架??

沿途去機場,都係超大雨!多謝莎爸一早起身車亞莎,唔係亞莎一定濕哂囉!去到機埸,都好多人呀!雖然已經 online check in 左,不過都好多人排隊等寄行李。基本上亞莎可以唔寄,不過朋友係大喼呀,反正佢都要寄囉,寄埋啦。

之後就同莎爸莎媽佢地食個早餐!(一陣上機仲使食既??),食完都差唔多要入去啦,好啦,高雄,墾丁亞莎嚟啦!之但係..上左機之後,因為太太太大下既關係唔可以起飛,係機坐左一個鐘先可以飛到呀!雖然係遲左一個鐘,不過同亞莎預既時間差唔多,因為亞莎冇諗過高雄機場同酒店係咁近既,坐的士都只係坐左60蚊港幣就到了!

因為落雨,都冇咩地方可以去,先去左夢時代,幫朋友搵書同砌圖,砌圖搵到了,不過書冇喎,等得佢嚟,亞莎都走左啦,所以冇買!不過係買野之前,就去左地下foodcourt食野先!去左新台南,佢既鹵味真係超香呀!一聞到已經好想食架啦!超正!香爆!不過亞莎行到咁上下對腳已經好痛啦,點會咁架!明明對涼鞋係香港都有著呀,點會嚟到先腳痛架!但係睇唔啱鞋,所以冇買!忍呀!之後再上埋夢時代既天台,坐佢既 Hello Kitty 摩天輪,係啦,亞莎係唔鍾意啦,不過佢有大口卡架,只係亞莎唔中,中左個 Dear Daniel 之嘛!不過都好靚啦!仲估佢唔到有冷氣架!成位台幣150蚊(即係唔使40蚊港幣),都可以啦!而佢仲有相影,一心諗住呢尐都係貴架啦,不過影左先算啦,可以唔要架嘛!點知落到嚟,原來都係台幣150蚊,就有兩張4R,好心香港迪迪尼都效法一下啦,咁咪人人都幫你買囉!仲過埋膠架!抵呀!

之後又坐捷運返酒店放低野先,因為朋友買左洗頭水呀,豉油呀咁,唔放低真係玩野啦∼∼亞莎即刻換另一對鞋(其實係亞莎帶去當酒店拖既人字拖嚟)都唔理得咁多啦,對腳已經痛到不能在痛啦!之後就坐捷運去左西子灣,一心想睇日落既,不過睇咩呢,因為落雨,好多雲,雲就有得你睇!但係亞莎佢地都去左食好出名既「超大支黑輪」(黑輪係肉甜不辣既物體,圓圓一條大香腸咁,好味架),台幣40蚊,不過有成30cm咁長架!好味!而佢仲有湯,任飲既,基本上係唔使飲野已經OK!佢仲有其他野食架,不過又點食得落呀!

之後天都開始黑啦,就住捷運去美麗島啦,美麗島只係一個大型轉車站,就因為佢大,所以入面就整到好靚,如果你要睇佢靚既一面,就要係黃昏6點後先好去,唔係你就會影唔到架啦。而捷運站入面都有尐小店舖,賣尐野都係自家製既,出面冇架!所以有時間可以睇下。影完相,亞莎佢地就去下一站,巨蛋啦!原因係巨蛋站個度有個夜市,好多人叫亞莎佢地去六合夜市,不過六合話係比遊客多,所以都係去個地道尐既好!個度真係超多野食,同埋係超多人呀!救命!想行都難行呀!亞莎佢地買左個好出名既可樂餅(叫可樂餅啦,並唔係可樂嚟),同埋一個烏賊燒!好熱好熱,遠遠見到有「貢茶」,好啦,亞莎未飲過架!就係台灣飲第一次啦!去到見到有「冰淇淋紅茶」,根本就不能抗拒啦(但返到香港發現,原來香港都有架)!正呀!台幣40蚊(香港賣港幣15蚊),即刻人都涼哂啦!掂掂掂呀!哈哈∼∼

因為朋友唔記得帶睡衣(佢帶左好多衫呀,係唔記得帶睡衣),所以係夜市行下,睇下有冇短褲買條啦,就係個度比亞莎見到有涼鞋拖鞋賣,仲睇中左,即買!唔使港幣100蚊,唔理啦,買左先!仲同老闆娘講「唔使包,即著」,哈哈∼∼之後朋友再去買多個鹽酥雞,再行左一尐舖頭就走啦。今日既行程亦告一段落。不過真係好在走得快,返到酒店就橫風橫雨呀!真係多謝天公囉!

詳情:【高雄墾丁之旅2010 Day 1

Bad Behavior has blocked 1562 access attempts in the last 7 days.