Archive for the '201203 台北桃園個人行' category

【Last Mins之台北桃園之旅3】

 | March 19, 2012 23:59

12年3月19日 星期一

快樂既時間總係過得好快!今日已經係係台灣既最後一日啦。因為今日係星期一,CK 跟 Emily 媽媽都要返工,而宇希因為仲未好所以就先去姑姑家,所以一大早就出門口!尋晚已經執好哂野,今日準備好哂自己一個台北個人行!

首先先送宇希去姑姑屋企,再放下 CK 去坐 Shuttle Bus 返工,換 Emily 媽媽車亞莎出台北(Emily 媽媽係台北返工的),出到去景美站都未夠九點,還好係九點,所以捷運入面人唔算多,好舒服。去到台北車站,先將個超大旅行喼放低係台北車站行李託運中心,放一日都只要台幣十七蚊(係,冇睇錯,係台幣十七蚊,以件計同日計,即係有兩件就係台幣34蚊一日)。

 

放好行李就行番去車站,走過去坐捷運到後山崥站,因為亞莎今日要跟 Maggie 老師上堂呀!超開心呢!準時10點鐘去到老師既教室,上面有好多老師既手作,超勁呀!老師都好用心教亞莎呢!教左亞莎成差不多五個鐘先完成呀!亞莎自己都好滿足好滿足呢!係老師度都買左一尐工具就返去台北車站!本身老師有介紹亞莎去行五分埔,不過亞莎實在要醫肚加買野,所以打道回台北車站!

先上台北車站二樓食野先,超多店比你揀,真係眼花撩亂呀!真係超多呀!之後就行左去二樓既台隆手創館,話明手創館就真係有手創野你買啦。行完再落下面一樓,差唔多全部都係手信店,亞莎都要買少少手信返公司呢。下面有貓貓店(Wachifield),又有日本以外既唯一鬼太郎店,仲有好多地道手信,亞莎都睇左好耐呀!時間都差不多就行去拎番件行李,個度既人都好好,仲比亞莎打開個喼嚟 pack 頭先買既野添!等亞莎唔使拎得咁狼狽。執好啦,向國光西站進發,就即係坐車入機場,點知上左車先見到飛機 delay 呢!都冇計冇法啦。

入到機場,in 已經一早 check 左,所以只係要放行李。之後就過關入去啦。入面都有好多店可以行,不過亞莎覺得,如果入面都開埋誠品會更好,因為等機最好就係睇書嘛!行下行下都差唔多夠時間啦,打個電話比CK,感謝佢同 Emily 三日嚟既照顧呢,就上機了!台北,亞莎好快就會再嚟架啦!原來個人遊(真係自己一個人)係更好玩架!哈哈哈哈∼∼∼

因為飛機 delay 加上返到香港機場又有技術故障,所以成12點半先返到屋企(已經係坐的士),好攰,執一執野已經要休息啦!三日既行程買到滿載而歸,好誇張呀!

 

【Last Mins之台北桃園之旅2】

 | March 18, 2012 23:10

12年3月18日 星期日

尋晚執下野又瞓啦,瞓醒今日仲厲害,去陽明山!因為 Emily 知道原來亞莎鍾意馬蹄蘭(又即係佢地叫既海芋),所以帶亞莎上陽明山竹子湖,因為個度有好多馬蹄蘭,仲可以自己採架!不過係上陽明山之前,加左一個去 Costco 既行程∼∼哈哈∼∼又可以買!

上完陽明山,係上面食埋野,慢慢返落嚟都已經買點多,亞莎佢地就出發去買千翔啦!間佳德仲誇,要係門口排隊!好多人呢!之後再向誠品進發!當然係誠品就會行上好幾粒鐘啦!哈哈哈哈∼∼

【Last Mins之台北桃園之旅1】

 | March 17, 2012 23:07

12年3月17日 星期六

尋晚到 CK 家都已經11點多12點,多得個4位唔知行左去邊既乘客∼∼∼

Emily 媽媽一早為亞莎準備好水果∼∼∼係好好味既蓮霧呀!真係多謝 Emily 同 CK 啦!已經比亞莎有屋住,仲有水果茶點早唔晚飯供應呢!

起身就出發,CK帶亞莎去睇花,話櫻花都開啦。上左去花海農場,話農場當然有動物呀,馬、羊、兔都有呢!宇希仲好大膽話騎馬添呀!行完花海,CK再有亞莎去大溪老街,買左好多野(四隻貓頭鷹)同埋食左好多豆干!因為個度超出名架!但CK想食既百年飯店,因東主有喜,休息一天呢!

去完大溪就返屋企,因為 Emily 媽媽今日黃昏要去做檢查,所以亞莎一個就自己出台北啦。CK先帶亞莎去坐車,之前就去出左張台灣大哥大,咁樣就可以上網同打電話搵到CK啦嘛。出張卡台幣345,可以打電話仲有3日無限上網!勁呀!

出到台北,話早唔早話夜唔夜,但唔需要幾耐亞莎已經行到冇力,買到冇力!自己一個人行台灣係好危險的,係自己個荷包會好危險,會乾硬化呀!只係行地下街,10蚊店都已經夠誇啦,不過最誇係亞莎行左去小熊媽媽,買到變成VIP!平時上網訂,今次去到睇又係另一回事!好震撼呀!

Bad Behavior has blocked 167 access attempts in the last 7 days.