Archive for the '200505 莎府一家澳洲行' category

【AUST-D13-MELBOURNE】

 | May 22, 2005 22:42

今朝一早(今晨)三點幾起身出門口去機場,不過唔係亞莎返香港,而係亞莎爸同亞莎媽先,亞莎會係今晚十一點先飛(係,冇錯,亞莎同莎爸莎媽係唔同機既)。送完佢地上機都只係六點幾,咁早冇咩好做呢....咪係機場等吓行吓,再到DOWN TOWN行多個圈囉。

出到去,都只係十點鬆啲,不過都有SHOP開左,咪真係好似SHOPPING咁周圍行。不過亞莎想去個間,佢竟然星期日休息...唉...

咁亞莎行左好耐,有去左尋日冇去既「G.P.O – 郵政總局」,不過入面都已經變成一個名牌SHOPPING MALL,不過入面都保留左一啲古老既建築。

行過一間公司,比亞莎見到一個大大大MARVIN,好似個小朋友咁大架。

用盡哂所有既力氣,行到六點幾,亞莎坐番機場巴士返入機場,再等到十一點上飛機飛返香港,完成呢個十三、四日既澳洲之旅。

【AUST-D12-MELBOURNE】

 | May 21, 2005 22:39

今日係游閒既一日,亞莎爸同亞莎媽佢地會係今晚(應該話係聽日凌晨至真)就返香港,咁所以今日游閒啲,係「墨爾本」個DOWN TOWN度行吓就算。

首先去左「QUEEN VICTORIA MARKET – 維多利亞女皇市場」,係墨爾本主要生鮮同雜貨MARKET,不過原來原本係一個墓園,係1837年開始啟用,到左1877年,唔知點解部份墓園改為市場,慢慢所有墓園都要掘走遷移,至到1922年先變成而家既MARKET。

跟住買完野,去左「BLOCK ARCADE」同。「ROYAL ARCADE」度行街同埋食LUNCH。「BLOCK ARCADE」同「ROYAL ARCADE」係墨爾本現存最古老既商場,建於1869年,再於1908年擴建。商場入面最著名既係神話雕像。

再跟住亞莎佢地去左墨爾本既市政龐同聖保羅大教堂。原來市政廳既經費係來自當年淘金熱既收入。

原本途經皇家鑄幣廠,由於不對外開放,所以不能參觀。據旅遊書所講,鑄幣廠係1967年已經遷往坎培拉,而墨爾本廠亦終止鑄幣,原本鑄幣既地方而家就變成左停車場。

途中發現有好多馬車係路上行使,但至於車費要多少就唔太清楚。加上路上有電車,所以遊墨爾本係好方便。而且唔會唔識路,因為係SWANSTON STREET有個大火車站 – 「FLINDERS STREET STATION」,係整個墨爾本最繁忙既火車總站,亦都係當地最為人知既景點之一。

【AUST-D11-GREATOCEANROAD12APOSTLES-GEELONG】

 | May 20, 2005 22:37

今日既行程就係「GREAT OCEAN ROAD – 大西洋海岸線」,佢被喻為世界最靚既風景道路之一。佢每一個轉灣位都有令人意外既美景。

亞莎佢地一心係想去睇十二門徒石,不過係沿途既其他景色都吸引左亞莎佢地停低落嚟。

首先係「WARRNAMBOOL」既酒店出發,沿住「GREAT OCEAN ROAD」前往「12 APOSTLES」,「WARRNAMBOOL」係一個海濱城,佢最出名就係每逢5月至10月都可以係海灘睇到「南露脊鯨」,好好彩,啱啱亞莎去到個日,第一條鯨魚就游番左海峽,用望遠鏡既話都可以睇到。

之後亞莎佢地係「LOCH ARCH GORGE」度停低影相,其實大西洋路都係睇呢啲石既景色,不過啲侵蝕真係好厲害,而啲風都真係好強勁,加上浪亦斬一浪接一浪咁,所以有咁既風景。

離開左「12 APOSTLES」之後,亞莎去地就向「GEELONG」進發,佢係維多利亞區第二大城市,不過亞莎佢地去個度純粹係去探朋友,見番十幾年冇見過既朋友,好開心,仲係佢地屋企燒番個鷄翼先走。

【AUST-D10-BALLARAT】

 | May 19, 2005 22:35

今日亞莎一家去左一達叫「BALLARAT」既地方,有咩咁出名呢?話說係1851年,當時一位礦工發現左「GOLD – 黃金」,隨著可觀既發掘,世界各地既人都一一咁湧入呢一個地方。而淘金熱就係1870年開始消退(鬼咩,掘咁多年,咩都比你地啲人掘哂啦),不過直到今日,「BALLARAT」仍然係維多利亞區最大既內陸城市。

而「SOVEREIGN HILL – 君主山」係一座金礦區博物館,比亞莎佢地呢啲遊客可以體驗當時既生活。而呢個鎮入面既人都係穿著住當年既服飾。入面有一間叫「MONTROSE COTTAGE」係以前一個礦工既屋企,原來係小鎮既最後一座原始礦工既屋。屋入面既所有物品都裝飾到同當時係一樣,例如19世紀既衣車同BB搖籃等等。

而附近就有一間「GOLD MESEUM」,展出黃金既用途同飾物。不過亞莎發覺好似香港啲金鋪仲比佢靚啲。

【AUST-D09-PHILIPISLAND-PENGUINPARADE】

 | May 18, 2005 22:34

今日亞莎佢地去「PHILIP ISLAND」,佢有咩咁出名?就係有得睇全球最細既企鵝仔啦。個度出左名好凍,所以聰明既亞莎媽連暖水壺都出動埋。

係去PHILIP ISLAND既PENGUIN PARADE之前,亞莎佢地去左一個叫GIANT WORM既WILD LIFE PARK度睇其他既動物,唔好講笑,亞莎踏足左澳洲九日都未見過袋鼠同樹熊,係呢個PARK就可以一次過見到哂啦。

仲有澳洲先有既WOMBAT都有得睇,不過咁啱亞莎去到既時候佢地瞓哂覺覺,所以冇得抱起佢地嚟影相。當然,亞莎都同左袋鼠先生們影相啦,其中仲見到袋鼠媽媽個袋有個BB係度混呀。

跟住玩飽就去PENGUIN PARADE度等睇企鵝仔上岸,由於入黑既關係,氣溫當時只有三度,凍得亞莎佢地將所有既衫都著哂上身嚟保暖。而FLASH會嚇親啲企鵝,所以PENGUIN PARADE入面係唔比影相既。

亞莎佢地好好彩,當晚有941隻企鵝返上岸(係日日都唔同)。不過當佢地發現唔見左啲同伴既話,佢地會咩都唔理,跳返落水,出返去海度搵番先再上岸返屋企。

【AUST-D08-CANBERRA】

 | May 17, 2005 22:27

今日亞莎佢地去左澳洲既首都 – 坎培拉。

坎培拉都唔算有太多野行,亞莎佢地都只係去左「國會三角地帶 – PARLIAMENTARY TRIANGLE」度行左一陣唶。三角地帶為舉行國家盛事既焦點,三角頂點為「首都山 – CAPITAL HILL」,國會大樓坐落其上。而舊國會大樓亦位於新國會大樓對面,新舊既對比一目了言。而舊國會大樓亦對外開放參觀,入場費亦只不過澳幣兩元(約港幣12元)。

之後亞莎佢地係附近既「格里芬湖 – LAKE BURLEY GRIFFIN」度行左一個圈就走,因為聽日去既PHILIP ISLAND距離坎培拉大約六小時既車程,所以都唔可以係坎培拉逗留太耐。

【AUST-D07-BLUEMOUNTAIN-KATOOMBA】

 | May 16, 2005 22:21

亞莎一家係MOTEL食早餐,有美味既ENGLISH BREAKFAST,係個度仲有以前關於澳洲既報紙睇,有啲已經係192X年既添。

之後呢,亞莎一家去左BLUE MOUNTAIN(藍山),個度真係一個好靚既地方。個度既藍山國家公園(BLUE MOUNTAINS NATIONAL PARK),佢既地貌來自2億5千萬年以上既沉積(亞莎以地理書上所說),後來經侵蝕而露出峭壁同埋峽谷。而藍山既名稱就來自桉樹釋放既油脂所形成既藍霧。

講番藍山先,山脈有成海拔1,100公尺,最出名既有三姊妹岩(THE THREE SISTERS),係侵蝕作用做成既壯麗奇景。但係係原居民既傳說之中,實為被其父親監禁,以防惡靈既三姊妹。

首先亞莎佢地去到藍山,就坐個度既纜車去觀景,點知上左車先知度死火,原來第一架叫「RAILWAY」既紅色觀景火車有個別名,稱為「全球最陡直既鐵路」(THE STEEPEST INCLINE RAILWAY IN THE WORLD),嚇得亞莎媽死咁濟,衰就衰在架車連安全鎖都冇...呢架車原建於1880年代,為左載礦工下至谷地既煤礦區。

落到去,已經得番半條命(當然係講亞莎媽啦),行左一陣國家公園就坐另一架纜車「FLYWAY」上番上面山頂,再住第三架「SKYWAY」係山谷高空205公尺沿空中纜繩而行,車底仲可以觀望到腳下既景色。

離開左國家公園之後就去左隔離LEURA既「回音谷」(ECHO POINT),係個度以近距離再睇一次「三姊妹岩」。

【AUST-D06-SYDNEY-CITY-OLYMPIC-KATOOMBA】

 | May 15, 2005 22:17

由於尋日去唔到CENTRE POINT,所以今朝一早就上去CENTRE POINT睇SYDNEY既景色,真係好靚好靚,加上今日天氣又好好...

原名為雪梨塔既AMP TOWER(CENTRE POINT),係南半球最高既瞭望台(WELL,佢地咩都係同南半球比既唶,唔會有多),可以欣賞到SYDNEY360度全景。

上面仲有一個話係南半球最高而又仍然運作既郵筒(THE HIGHEST WORKING POST BOX IN THE SOUTHERN HEMISPHERE)。

去CENTRE POINT睇完仲有個SKY TOUR睇,即係好似係山頂或者海浪公園度玩個啲虛擬遊戲,之不過就真係唔係咁好玩,一來佢郁到你頭都暈埋,另一方面...個冷氣唔知做咩咁勁...亞莎佢地每一個都凍到死咁...

之後亞莎佢地就去左CENTRE POINT隔離既QVB(QUEEN VICTORIA BUILDING – 維多利亞女皇大樓),呢棟1898年起既前農產品市場占據左一整條街,而家係一個大型個SHOPPING CENTRE(有啲似英國MANCHESTER既TRAFFORD CENTRE,咁當然係靚好多好多啦),而佢既大樓天花板下懸掛住1982年N. GLASSER設計既皇家時鐘,每逢搭正就會有遊行隊伍,描述英國皇室生活(咁啱亞莎佢地去到差唔多十二點,所以有得睇)。

而亞莎佢地仲係個度食埋午餐同埋比亞莎買左一個2004年既PIGGIN添...嘻嘻,YEAH!

跟住亞莎佢地就去KATOOMBA,順便去埋2004年SYDNEY奧林匹克運動場,唔係話有咁多野睇,不過咁啱順路,都可以去睇吓既,不過每個場都要分別比入場費既...

去到KATOOMBA都已經天黑,聽日一早就要去BLUE MOUNTAIN度睇THREE SISTERS...

Bad Behavior has blocked 227 access attempts in the last 7 days.