Archive for the '200509 台北中秋快馬行' category

【光華商場-西門町-中正機場-香港】

 | September 19, 2005 23:48

今日係亞莎同龜姬既台北之旅既最後一日,亦係三日嚟可以瞓得最晏既一日,成九點先起身落大堂食早餐,因為今日既目的地只有一個,就係「光華商場」,即係有啲似香港既電腦商場囉。亞莎今日去係要幫同事買VCD,佢地同亞莎講話好平架喎啲VCD,日劇呀,韓劇呀呢啲。不過商場今日要十點半先開,亞莎同龜姬好自然就可以瞓得晏囉。

不過都係亞莎同龜姬去光華商場前係西門町影多一兩張相先,西門町出名既「紅樓劇場」,亞莎同龜姬都冇睇過,襯今日仍然係咁好太陽既日子,一定要去睇一睇先得嘛...

之後亞莎同龜姬都係坐捷運去光華商場,一出捷運站行都唔使5分鐘就到,好易搵。只要出啱出口就得架啦。出口係台北科技大學出口,沿住去科大個條路就啱架啦。

不過亞莎同龜姬係去之前都CHECK過先,因為光華商場會有年休既,如果去到休左就唔好啦,係咪!

行完都唔使30分鐘(亞莎只係要買兩套之嘛,加上亞莎自己一睇就睇中買邊啲,諗都唔使諗)。亞莎同龜姬就坐最後一次捷運返西門町作最後衝刺買手信,邊啲未買既就買埋(亞莎都係買比公司呀,呢啲,事關冇$$啦嘛)。

十二點,落大堂CHECK OUT同埋等飛狗巴士嚟車亞莎佢地去中正機場囉∼∼不過原先已經有一架大飛狗巴經過,不過佢飛站喎,好在有個飛狗巴既人係度,亞莎同龜姬先冇咁驚咋(不過都有好多其他既香港人同亞莎佢地一齊等緊)...

去到機場,CHECK IN左,攪掂哂啲野,亞莎同龜姬食埋係台北既最後一餐,就結束呢一個中秋台北之旅啦。

食完野,亞莎同龜姬就向住國泰CX467號班機入座,再同台灣講句∼∼後會有期!

【國父紀念館-故宮-淡水-野柳-美麗華-士林夜市-誠品】

 | September 18, 2005 23:40

今日比尋日好,可以瞓遲半個鐘,朝早七點起身落酒店大堂食早餐,再向第一目的地-國父紀念館出發。

酒店既早餐,亞莎比三個字佢:快、靚、正!一落到去,個WAITER已經帶亞莎同龜姬入去食早餐,亞莎佢地一坐低,兩杯鮮搾橙汁即時奉上,之後新鮮麵包就到。再坐多一分鐘未夠,熱騰騰既火腿煎雙蛋又到,跟住,個WAITER就問亞莎同龜姬要飲啲咩?吓?又飲,杯橙汁都未...亞莎就答:一杯熱奶茶,麻煩你,龜姬都同亞莎講左一樣既答案...前後食埋都唔使十五分鐘...大家話係咪好快呢!

之後亞莎見時間尚早,亞莎即刻係柜枱度買定兩張聽日既飛狗巴士券,咁唔使聽日咁趕嘛...

之後亞莎同龜姬就上房攞埋啲袋就出發去呢個「國父紀念館」,坐捷運都唔使十五分鐘,出左捷運站都唔使行個3分鐘,就見到好宏偉既「國父紀念館」,咁啱去到差十分鐘就開門,咁亞莎同龜姬就係出面影一影相先,因為出面個公園都好大,又有國父既銅像,太陽又大到唔知係咪想曬死人...影到亞莎一見到佢開門,亞莎同龜姬即刻一個箭步衝入去...啱啱好比亞莎同龜姬見到佢步操儀式,真好彩!佢地真係好整齊...亞莎同龜姬嘆為觀止呀!

之後亞莎同龜姬就再坐捷運去劍潭站,再轉公車(即係巴士)去「故宮博物院」,一去到...嘩!超多人... ,不過中途公車又經過左一個景點,中影文化城,哈,又一個冇安排下既景點。

行完「故宮博物院」,亞莎同龜姬就坐番巴士去捷運站,向淡水出發!坐捷運既中途,其中有一個站叫「唭哩岸」,好攪笑個名,亞莎都要好快咁影左兩張相...

去到淡水,一如早幾日既天氣,好天到暈咁滯...亞莎龜姬就係呢度開始佢地既午餐...一去到就見到人人話要食既「亞給」同「魚丸湯」,兩樣加埋先成為60蚊,跟住行到對面就見到呢個魷魚王...亞莎同龜姬當然都要整番隻試吓啦...哈哈...跟住沿途都有好多野食,不過亞莎同龜姬都係主力去搵個個超高既軟雪糕...真係比亞莎同龜姬搵到,一米高既要20蚊,食唔哂咁多既就要個10蚊既啦,都有一半咁高架!有朱古力+雲呢嗱味或者鳳梨+綠茶味,亞莎同龜姬要左一人一個朱古力+雲呢嗱味,正!

行哂成條淡水老街,手信又買埋...亞莎同龜姬就開始坐公車去野柳...不過呢程車就辛苦囉,啲路又爛,又遠...坐左亞莎同龜姬差唔多個半鐘,係等車既時候,龜姬仲係間CD鋪(因為出門實在太熱,一定要入去抖抖涼先得)度買左一隻GARATH GATES既CD添呀。

上到公車,亞莎好眼瞓,所以先瞓左半粒鐘,醒左之後就到龜姬瞓...話哂亞莎同龜姬兩個都係一早起身,又好夜先瞓,所以呢...好攰...

終於都去到啦,亞莎同龜姬都係一支箭飈去睇女皇頭...好多人好壯觀...亞莎佢地行完就再去左野柳個條短街度買莎媽指定既手信...「雞泡魚干」...之後亞莎同龜姬又去等過架公車返淡水。返到淡水差唔多夜晚七點幾,亞莎同龜姬決定去少一個景點,就係BUBU餐廳...不過就梗係照舊去美麗華百樂園度坐摩天輪同埋去士林夜市啦。

去到劍潭站,有免費接駁巴士去百樂園,就係中途巴士經過左另一個景點,忠烈寺,亞莎同龜姬又去多左一個地方(雖然只係走馬看花,都好過冇)。去到百樂園,已經有好多人,仲好多人排隊等摩天輪添...亞莎同龜姬買左飛都要等成45分鐘先有得坐,可能啲人都好似亞莎同龜姬咁諗,想近距離咁嘗月啩,話哂佢係繼英國既LONDON EYE之後,第二大既摩天輪嚟架!

比亞莎係百樂園見到OLIVIA豬呀,不過太貴,亞莎唔捨得買,唯有影多兩張相啦。

坐完摩天輪都成九點幾,亞莎同龜姬就坐番接駁巴士返劍潭站,一到劍潭站,已經聞到好香既味道,原因係士林夜市就在眼前囉。入到去,亞莎同龜姬先行左一個圈,之後就揀左一間鋪坐低食晚餐,叫左一個牛肉撈麵加一個紅油抄手食吓先,之後再去第二度食個「棺材板」,樣樣都好好味...

食完再去左士林夜市既另一面行,再食左啲魚丸同飲左一杯即叫即搾既木瓜奶...正!

食完哂,離開士林都成12點,亞莎同龜姬再坐捷運去敦南誠品店度幫同事同埋莎嫂買書,亞莎自己反而買唔到添。亞莎同龜姬再坐的士返酒店,返到去已經成一點咁滯,亞莎同龜姬就攞哂所有既戰利品出嚟影張相,再將所有野PACK番落喼...一個字∼∼攰!

沖完涼吹埋頭已經係三點...亞莎同龜姬已經立即去左搵周二公子同周三公子囉...

【瑞芳-九份-十分-平溪-101-京華-饒河街】

 | September 17, 2005 23:11

今日一早起身,感覺好似未瞓過,亞莎同龜姬兩個七點就出門口向住瑞芳出發。

由於七點就出門口,酒店既早餐都未開市亞莎佢地就出去,變左早餐都要出去食,一過酒店對出個條馬路,對面就有一間轉賣早餐既小鋪,亞莎同龜姬係個度叫左一人一杯豆漿(同香港個啲唔同既,老闆娘話唔知佢加左啲咩同咩(亞莎都唔知係咩既野啦),同埋兩份鍋貼,見佢25蚊有7粒,應該唔會好大粒,點知...嘩...都好大粒一粒架。不過亞莎同龜姬要趕去搭捷運再去台北火車站,所以都冇食,直到上左去瑞芳個班火車先食...

去到火車站,已經係七點四十分,離開往瑞芳既火車只有十分鐘既時間,不過人龍長得嚇死人,好彩咁啱線佢開多一個COUNTER,所以亞莎同龜姬一個箭步衝埋去買飛,再跑落月台上火車...

唔知係咪因為中秋既關係,火車上面人好多,所以亞莎同龜姬全程都係企...好彩車程都係50分鐘左右...唔係太耐...

去到瑞芳已經係八點四十五分咁上下,亞莎佢地就上左一架的士(冇錯,的士,亞莎同事話的士安全啲如果上九份既話),上到去都唔使十五分鐘,去到九份,嘩...好靚呀!

亞莎同龜姬即刻去發掘呢一個悲情城市...不過講真,所謂既悲情城市一啲都唔悲情,都不知幾有情添...九份之所以叫九份係因為呢個小山頭以前住左九戶人家,以前出城市唔係好似面家咁方便既,所以如果有一戶人家會出城既話,就會幫另外個八戶人家買野,所以一買就買九份,咪比人叫左呢一度做九份囉。

去到九份,亞莎同龜姬梗係唔放過呢個嘆茶既機會啦,不過其他人就嘆中國茶,亞莎同龜姬就變一變,嘆一嘆呢個亞莎至愛既奶茶先得!

嘆完茶,亞莎同龜姬就返落瑞芳,再坐火車去十分,冇錯係十分,好多人都唔係好知道呢一個地方,不過亞莎睇書睇到,覺得個大瀑布好靚,一定要去睇吓,於是亞莎同龜姬落左車就向住十分大瀑布出發...不過開頭行錯左少少路,白行左一條驚心動魄既吊橋...可能因為有好多人行既關係,條橋行到中段,搖得好厲害...嚇得亞莎同龜姬半死...點知行錯左路,要行番轉頭...行多一次...

搵到條啱既路亞莎同龜姬就一直向前行,唔理前面仲有幾多條吊橋(起碼都行左兩三條)...終於比亞莎同危姬搵到個大瀑布啦,不過原來要比$$睇既...激死!咁當然亞莎同龜姬都比啦,行得咁辛苦,辛苦係行左成兩公里先去到架,之後又要行返轉頭趕火車架嘛...不過真係好值得睇,真係好靚,好舒服既感覺。

之後亞莎同龜姬以呢個九秒九既時間行返去十分火車站(當時對腳已經唔屬於亞莎同龜姬架啦),再坐火車去平溪(實質亞莎同龜姬係坐到去菁桐站既),去到個度,亞莎同龜姬真係要醫醫個肚先,去左一間小鋪度食左個台灣牛肉麵(唔理敏感唔敏感啦),點知入到去,個老闆娘好好人,話比亞莎同龜姬聽啲路點行,等亞莎同龜姬既下一個目的地搵得一啲都唔辛苦...

仲要間鋪頭原來係拍「流星花園II」既場景,係仔仔係入面住個四日個喎,有哂佢地既簽名同合照係入面架。不過都有啲攪笑野架,就係老闆娘個仔成日想係鋪頭個錢兜度攞$$去玩,但係又比老闆娘發現...哈哈!

食完亞莎同龜姬就去左下一個目的地,「皇宮」!大家唔好誤會,唔係咩野真既「皇宮」,只係一間日本式既茶店,不過入面係唔可以影相既...好可惜呢,入面真係好靚架,好似去左日本咁既感覺架。行去「皇宮」路,中有一個許願竹柵,上面有好多許願竹筒,亞莎同龜姬當然唔會錯過呢一個許願既機會啦,亞莎仲幫亞莫許埋添呀!

行完呢度,亞莎同龜姬就返番去菁桐火車站坐電車返台北市,電車同火車有咩分別?分別就係火車比較快啲同埋可以對號入坐,而電車就冇對號入坐同埋慢啲啲,不過亞莎佢地揀左電車係真係一來平啲,二來等車既時間短啲...不過上到架電車...凍到亞莎同龜姬差啲變左冰條...好在亞莎有外套咋!

返到去台北市,亞莎同龜姬又先返一返西門町買一買啲手信同埋放低部份行裝再出發去台北市中心行吓...

亞莎同龜姬坐捷運去到忠孝站,先去NYNY睇吓,點知原來台北101就係佢對面,近得不得了,原先唔去既地方竟然自動出場...哈哈!

行完之後,亞莎同龜姬就去左京華城,人人話京華城係台北既地標,咁亞莎同龜姬又點可以唔去呢...入到去,亞莎同龜姬又係時候醫肚,落到FOOD COURT見到「度小月」,咁亞莎同龜姬又點可以唔食呢...好味!就係呢個時候,比亞莎見到一個似曾相識既人(當然亞莎係唔識佢架啦,只係係電視既過呢個人),就係「薔薇之戀」其中一個男主角,好似叫做黃智偉吧(其實係NICOLE話番比亞莎知佢叫咩名既)...佢真係好高好靚仔吓架...

亞莎同龜姬一路食既時候,側邊不停有人係度表演,好似係啲咩中秋活動之類既野...食完亞莎問個個男WAITER,問問佢點樣去饒河街夜市,佢同亞莎講好易去,唔使擔心,仲連個地圖都畫埋比亞莎,真係好好人呢。

去到饒河街夜市,嘩,個度真係有好多人...行都行得好辛苦吓,不過好熱鬧,好似平日既女人街,或者係花園街咁,不過多好多唔同既野囉...

行完之後,亞莎同龜姬再坐捷運返酒店...返到酒店已經係凌晨十二點半咁上下...又係亞莎同龜姬回顧今日既行程,同埋執野,沖涼瞓覺既時間啦...聽日又係早起既日子...亞莎同龜姬要去國父紀念館,故宮博物院,淡水,野柳,美麗華摩天輪,士林夜市同埋24小時誠品書店...早抖...

【香港-中正機場-西門町-中正紀念堂-夜市】

 | September 16, 2005 23:08

今日唔使返工,期待已久既台北之旅即將開始啦...心情...好緊張呢!

朝早九點幾起身,到十點出發去機場!

去到機場啱啱好十一點,離攞機票既時間只有十分鐘...一陣,龜姬都到埋,攞埋機票就同莎媽同莎媽一齊食個LUNCH,就係行去食LUNCH既MOMENT,比亞莎見到∼∼許志安,佢著到一身黑,帶住頂帽,行得好急咁唔知去左邊間鋪頭度...跟住亞莎同龜姬都食個快晏就踏上佢地既台北旅途啦!

出境都唔算好多人,過CUSTOM都係用左2至3分鐘唶,之後坐埋無人架駛就去到63號閘口,向住國泰CX466號班機進發。

班機真係好準時,一點二十五分就見佢開始駛出去,不過係跑道兜左成30分鐘都未起飛... ...飛到去台北中正機場已經係下晝既四點,點知...一去到CUSTOM...見到既係...「人海」,人多到嚇死人...龜姬就去左辦落地簽證,亞莎就係度排隊(亞莎係唔使簽證架嘛)...時間啱啱好,龜姬攪掂個人台證既時候亞莎就啱啱排到第二個,之後亞莎就過關啦,亞莎比本PASSPORT個個台灣入境處既人,佢第一句就問:「台證還未去辦嗎?」亞莎都未嚟得切去答佢,佢就自己再講:「呀,你這個不用」... 亞莎夠知係唔使囉...佢好似驗屍咁驗亞莎本PASSPORT,先肯給個入境印比亞莎咋...

之後亞莎佢地就去匯錢同埋去坐機場巴士!不過...中途又有啲塞車...去到酒店已經係六點幾,所以第一要去既景點就去唔到啦...唯有下次啦...

之後亞莎佢地就去左呢個酒店CHECK IN,酒店都唔錯,亞莎覺得好好,雖然唔係大間(座酒店),但係就好舒服囉。

放低左啲行理就出去食晚飯,亞莎同龜姬行左落去西門町度搵間「爭鮮壽司」,行左十五分鐘左右就比亞莎佢地搵到啦。點解要去?因為佢每碟壽司只係港幣七個半...亞莎同龜姬食左十五碟(連埋甜品),都只係一百一十二個半,每人55蚊都唔使...抵!

不過佢原來係唔可以影相既,亞莎影完之後,佢同亞莎講話唔影得,不過冇叫亞莎DELETE囉。好彩!

之後亞莎同龜姬又見到「三年二組」呢間鋪頭,好多人,亞莎同龜姬都入左去八吓,好似旺角「潮流」�「新之城」咁既鋪頭囉,不過龜姬就係入面買左佢既第一筆台幣啦。

然後,龜姬同亞莎就開始佢地去旅程啦。首先先去捷運買左一人一張悠遊卡,好似香港既八達通咁既,搭捷運同巴士(公車)都方面啲嘛...

之後亞莎佢就去佢地第二目的地-中正紀念堂。去到初時以為佢隔離既國家藝術廳就係紀念堂,行過啲先知唔係...攪笑...

不過原本諗住去總統府添架,不過唔知點解又搵唔到,所以就放棄左囉...

之後亞莎同龜姬就搭番捷運去台北車站,行去許昌街...許昌街有咩野咁出名?佢有兩間必行既鋪頭(如果你係一個鍾意啲得意野,文具精品既朋友),因為佢地比係出面既其他鋪頭都平...個度有好多貓貓同大口仔既野,亞莎同龜姬好似傻左咁行哂佢地咁多層...好開心呢!當然$$都係有係個銀包度飛走左啦...

行完呢度,亞莎佢地就再坐捷運返西門町(亞莎佢地住既東龍大飯店係位於西門町既),係個度買左啲街邊野返上酒店度慢慢食,可能真係太熱,亞莎同龜姬都頂唔順要快快返上酒店沖涼洗頭,再嘆個電視,睇睇聽日既行程就瞓,瞓個時都成兩點幾,第二日仲要六點半起身添架...因為聽日亞莎佢地要坐火車去九份,十分,平溪(菁桐),再返台北市去NYNY,京華城,同埋饒河街夜市添。

【P.S.龜姬,如果亞莎有寫漏既話,記得話過亞莎知,等亞莎加番呀】

Bad Behavior has blocked 1574 access attempts in the last 7 days.