Archive for the '200706 龜姬慶生澳門行' category

【澳門之旅下集】

 | June 24, 2007 23:48

6月24日 星期日 晴

瞓左大約6個鐘(比平日返工多),亞莎先起身刷牙換衫就到龜姬,亞莫呢條懶虫梗係瞓多陣先,咁亞莎同龜姬就落去食個早餐,不過個早餐就麻麻地,麻麻地既原因有好多,首先好多人,去到根本係冇位既,第二,太多「中國籍」人仕,好嘈好嘈。亞莎同龜姬都係快快手咁食完就閃人,上去回合埋亞莫就出發再玩過。先去左住宅博物館行個圈,抵啦,行4個館都只係要5個大洋(一個人),都行左成個鐘架。講下舊時澳門人同葡萄牙人既生活文化,幾得意。有尐好古舊既擺設,例如入煤既熨斗都有。之後第二個館就係海邊之家,講沿海既葡萄牙人既起居同用具,不過呢個館因為有好多文件,所以唔比影相。第三個館就係講唔同地區既葡萄牙人既衣著服飾咁,幾得意。葡萄牙人結婚新娘係著黑色架...好特別呢!最後一個館就同呢幾樣野冇關,咁啱有個荷花展(其實5個大洋係睇3個館既,不過最後一個係免費所以叫有4個館囉),就入埋去睇,睇完又係亞莎佢地今個行程既重點,食啦。 😆

睇下個入煤熨斗?! 葡萄牙人結婚既服飾

去左一間叫熊貓餐廳既餐廳食,好舒服既感覺,亞莎發現澳門既餐廳放枱都好鬆動,每張枱都大大張既,亦隔頗遠一張,好舒服,一尐都冇迫既感覺。亞莎佢地叫左個葡國雞,牛扒同BB鴿,正!當然加左3個汽水啦。食飽都唔使45分鐘,咁亞莎佢地就向媽閣出發。其實唔係去媽閣,只係去隔離既海事博物館,因為龜姬同亞莫都未去過,咪去睇下囉,都係5個大洋一個人 😯 ,真係係香港唔可能發生既事嚟啦。入面都有講澳門既歷史同埋航海歷史。好似有鄭和7次下西洋既路線圖之類。行飽就過左去澳門觀光塔啦。亞莎上一次去澳門個時因為好大霧所以冇上去,而亞莫同龜姬又咁啱都冇去過,咁就去啦!每人70蚊上一上去睇,都幾值得睇,因為天氣好,360度既景都睇得好清楚!好過亞莎上一次去韓國,落大雨好大霧睇得好少咋! 😉

海事博物館指南針?! 真係未見過咁既樣既

上到去58樓,佢有小部份既地方既地板係透明既,即係你個人企係度各下望就會望到老遠既地面,好多人都係度大叫,亞莎就OK既,因為亞莫同龜姬已經好驚 😳 ,如果亞莎都比佢地知道好驚咁就唔好啦(講真,亞莎其實係畏高既)。都好叻咁比亞莎亞莫同龜姬都影左幾張相,仲係上面食左個雪糕添(係呀,又食,冇錯,又食呀),加上上左61樓室外區睇景,今日有好多人玩 Skywalk 同 Bungy Jump 呀,不過亞莎唔會有膽玩,所以小小都冇去考慮過玩喎。

澳門觀光塔睇下獅子仔同熊貓仔幾大膽?!睇下佢地扮得幾好野獅子仔都有份影架

玩飽就過漁人碼頭又(本身想去 Wynn 既,不過又唔賭錢既亞莎亞莫同龜姬決定放棄,出去行下好過啦),不過今日同尋晚就差得遠囉,差既地方係今日曬到冇人有,但因為3個都揹住行李都唔想拎遮啦。影左幾張相,同曬得太勁既關係,放棄了,又再過番大三巴個邊,做咩咪又係食囉,今次唔係食既,係飲為主,因為太熱既關係囉。去左一間叫唔知咩既朱古力店(唔記得叫咩)飲野,好味喎!亞莎同亞莫叫左個 Ice Chocolate Frio 而龜姬同平時一樣要左個 Ice Mocha 囉。不過味道唔錯,而且個冷氣又涼(與其話涼呢,其實澳門既冷氣都真係有尐誇,唔知係咪香港實行左25.5度既關係呢,澳門既冷氣好似只有15度左右,係超涼先啱,其實好易病)。食飽又去左行,亞莫又買多件衫,連同亞莎都買多左條裙,係香港都有呢間野,但係唔知點解亞莎未入過去,今次都係多得獅子衫,唔係佢,亞莎亞莫同龜姬唔會買左幾件心頭好喎。 :mrgreen:

獅子仔同熊貓仔係漁人碼頭合照 - 睇下幾曬凍飲亞莎佢地嚟啦

買完衫就係買手信既時候啦,莎媽落左 order 要買鳳凰卷同花生糖,亞翹就話要豬肉乾,咁亞莎都係係咁二買左尐就算,呢尐手信都真真唔平,好在上次熊仔比左張9折卡亞莎咋。龜姬都買唔少,佢買左5盒鳳凰卷呀都!勁!買完成手野又係做咩,食野囉。因為今晚坐7:45船,所以食埋先返香港,6點就食飯啦,因為呢兩日都真係塞得太多野落個胃,唔係咁好意思,今次食尐輕巧尐既,就去左食黃枝記。點都係澳門黃枝記好味尐,唔知係個心形住定咩,真係好味尐。亞莎同龜姬叫左個水蛟麵,亞莫就要左個水蛟牛腩麵,大家再加左個細既炸雲吞。超好味,但係個肚大左起碼3個圈,唔好講笑,返屋企真係要好好咁戒下口先... 😳

唯一既大合照 - -_-回程前既晚飯

係時候要同澳門講句「Goodbye my friend, seeya next time」啦。香港亞莎返嚟啦。不過一上船,嘩...亞莎知點解上次蘭尼會病,佢個冷氣有冇咁凍呀,都唔知有冇10度,個風係咁係亞莎個頭度吹...已經腳痛啦,唔好傷風好喎,有外套既亞莎同亞莫都頂唔住呀,真係唔知龜姬點頂呀! 😯

【澳門之旅上集】

 | June 23, 2007 23:37

6月23日 星期六 晴

尋晚好在放10點,返到屋企執下野就可以攤係床抖下先。同蘭尼傾左一陣(一陣啦),好好笑,真係唔明個腦去左邊,可以經常性唔記得野去到呢個地步。希望有改善,有改善啦。

瞓醒執一執埋尐牙膏牙刷就準備出發。去邊?之唔係澳門之嘛。龜姬今日要返工,所以約左下晝1:45係碼頭等。點知亞莎同龜姬係同一班車,1:30就到了。係碼頭商場行左一個圈,亞莫就到,即刻過關畫位等上船。

上到船,龜姬好攰瞓陣先,亞莎同亞莫就睇一睇旅遊書,睇下到步有咩食同玩。由於住氹仔個邊,決定到步放低行李就去食水蟹粥先。到左碼頭,亞莎同亞莫都係度搵架巴士,等極都唔見,一心諗住走去坐的士,點知就係亞莎同亞莫行左幾步之後,係後面既龜姬大叫「呀,格蘭呀」,亞莎同亞莫即刻跑番轉頭,衝呀衝,比亞莎佢地上到車。好在龜姬夠慢咋!

到步放低行李先,點知酒店免費幫亞莎佢地 upgrade 去間3人房(亞莎佢地好明顯就係屈蛇架啦),upgrade 左有一張雙人床加一張單人床,咁就唔使迫啦。放低哂野就行去官也街個邊食野,好近啫,行都好似唔使10分鐘就到(正常時間就係,不過今次行左20分鐘有多,因為大頭亞莫記錯路,好在亞莎有帶地圖睇下啫)。第一時間衝去食水蟹粥。 😛 亞莎未食過架,不過真係好好味,亞莎佢地3個人叫左個細既,再加一個酥炸魚球,好味呀!不過呢服務態度就一般囉。亞莎佢地比較早去到,所以都冇咩人,食完個時已經滿哂咁滯啦。好彩啫。之後一出去就去左買木槺布丁食,亞莎叫左個芒果味,龜姬同亞莫叫左個原味,好好味呀,亞莎都係第一次食,正!都只係7蚊啫。:mrgreen:

食飽之後返酒店坐酒店車出番去澳門個邊,去大三巴個邊睇野,其實好多地方都去過,今次叫做龜姬生日過嚟行下。點知比亞莎見到一件獅子 tee,仲只係29個大洋,冇理由唔買,但係因為咁,佢個 cashier 係2樓,你要經過好多衫先去到,就連亞莫同龜姬都有收穫。買完之後去左大三巴,係咁二影兩張相就去食飯(係又食啦),今次去音樂豆咖啡屋度食,見佢旅遊書有介紹,真係唔錯。亞莎叫左個音樂豆咖啡朱古力(明顯就係招牌貨),同一個焗海鮮蛋包飯,龜姬都係一杯招牌飲品再加忌廉蘑菇蛋包飯,而亞莫都係招牌貨加火雞螺絲粉。好好味!之後再叫左個咖啡果凍當蛋糕同龜姬慶祝,雖然有尐苦苦地,但係都唔錯呀。

去旅行點少得獅子仔 - 等食水蟹粥天壤之別 - 一街之隔蛋包飯加招牌貨 - 音樂豆咖啡朱古力壽星女 - 龜姬也

食飽諗起唔記得話去食手拉雪糕,諗起又要去了,胃呀胃,辛苦你了!去到好多人(都係大三巴附近既),又多種類,搞到亞莎佢地花多眼亂,亦加上個胃實在負荷唔嚟,最終叫一個兩種味3個食,就叫左 Lemon Cello 同 Mint(間野個名就係叫 Lemon Cello 嘛),好正!超好味,抵個肚飽到咁都要將佢放入去。

食到呢個地步,見到有間上樓書店,亞莎佢地就上去睇下,間書店好舒服,養左兩隻貓貓,好得意架。上到去,竟然比亞莎叫到一本未見過既「熊貓」書,啱哂龜姬啦,佢決定買!又比佢地兩個見到本「Gaspard & Lisa」既書,咁亞莎當然買啦(係香港冇見過)。咁又有收穫啦。行完之後呢就出發去漁人碼頭了。

Lemon Cello & Mint 手拉雪糕獅子仔與獅及衫

又係去坐車,先去番大馬路截車,好多人等車,係亞莎同亞莫諗住行後尐既時候,龜姬又叫啦「呀,有車呀」,亞莎同亞莫即刻返轉頭跑上車。龜姬,都係你得既!去到漁人碼頭,冇咩人,仲有一兩間鋪頭未閂,行左一陣就係碼頭行左個圈,好靚好舒服。有海風呢!不過亞莎隻腳已經痛得好緊要,唔知點解今朝開始已經係咁了...

行得咁上下已經12點咁上下,亞莎同亞莎決定打道回府,因為返到去仲有野玩嘛...哈哈∼∼∼ 😆

返到酒店亞莎第一個沖涼,因為佢地兩個都好慢嘛,亞莎沖完到龜姬,最尾先係亞莫,沖完涼成個人都攰都亞媽唔認得,攤係床度睇下電視先,等一陣玩 surprise surprise 嘛。龜姬同亞莫都沖完涼啦,襯龜姬唔覺亞莫放左一包野係龜姬床度,龜姬見到以為亞莎同亞莫整惑佢,問「咩嚟架,做咩放係我度」,亞莎同亞莫就話「你自己睇下咪知囉」...佢一睇就叫啦「嘩,咩嚟架,過左糭糭節啦喎」,亞莎同亞莫已經笑到傻左啦。叫佢自己拆嚟睇下係咩,佢一見到係小金就叫,因為小金被亞莫紮到成隻糭咁,根本睇唔到係咩...哈哈∼∼∼龜姬,生日快樂呢!

未鬆綁前既小金打回「原」型既小金

澳門之旅 2007 相片集

Bad Behavior has blocked 227 access attempts in the last 7 days.