Archive for the '200804 北京免費自由行' category

【北京自由行-Day3】

 | April 6, 2008 23:02

4月6日 星期日 晴

今日都係一早起身,怕又要等位食早餐,比尋日早半個鐘落去,點知,冇咩人?! 😯 又會咁既?!算,食得舒舒服服仲好!

先坐地車再轉一個多小時既巴士路程就到達長城-八達岭段。好多人呢!原來北京人真係好健康,放假竟然唔係去玩,而係去行長城!勁呢!

dsc09047_resize.JPG dsc09054_resize.JPG

其實長城都好易行上去,只係落個時就...因為太恐怖,條路斜都事少,問題係尐路行到「蝕」哂,好「跣」,好似想「碌」落去咁架!亞莎佢地行左唔多,因為人又多又唔知點咁,所以行左幾個關就落番去。不過好在落得快,落到下面就突然天色變暗,番大風同落雨,好恐怖。時間都唔知有冇個10分鐘,變得咁快?!亞莎佢地冇比50蚊要張「登上長城既證書」反而比左10蚊要左一個獎牌。可以刻名既呢!仲靚仲抵。不過比完錢行多兩間,竟然有間只要5蚊個,激死呢!明明10蚊可以買兩個,而家買得一個,貴左一倍呀!誇張!不過算啦,10蚊其實都好抵了。

dsc09088_resize.JPGdsc09067_resize.JPGdsc09093_resize.JPG

落番嚟,又坐個幾鐘車,就去埋天壇公園,不過而家入天壇公園都要比錢,如果要上埋天壇就要再比錢,有冇搞錯,咩都要比錢架!所以亞莎佢地冇上,只係入左公園行下咋!不過要比錢既天壇公園都咁多人既,仲係係入面跳舞呀、唱歌呀、最緊要係公然聚賭添呀!亞莎仲諗會唔會比人拉既呢佢地咁樣,點知亞莎見到有公安同埋班聚賭既亞叔傾計...又會咁既?! 😯

dsc09104_resize.JPG dsc09123_resize.JPG

行完之後就去左市中心個邊搵野食,見到有永和,就去試下啦。好味喎,仲要係行到咁攰,飲番杯凍豆漿真係一流呀!唔太甜,涼涼地真係唔錯呢!食飽仲行左北京新世界,不過亞莎從未去過好似街市咁嘈既百貨公司囉!見尐野一尐都唔平,根本唔會買既情況下,亞莎佢地改左去行「菜市場」,真係唔錯喎,有好多野賣,好多野可以試,仲有香港有得賣既野佢都有,仲平好多添呀!好似一支一公升既康師傅,佢只係RMB4.8咋,香港點買呀,一支500ml 都唔知買唔買到啦。

dsc09141_resize.JPG dsc09148_resize.JPG

又買左尐手信之後就返一返酒店,因為今晚想去睇水立方同鳥巢嘛,都幾近亞莎住個間酒店既。返到去同酒店影左兩張相咁就出發。係返去既時候,亞莎係地車早左一個迨落車,因為今朝出去既時候比亞莎見到佢有「百家姓」刻左係牆上,想去睇下影個相呢!不過唔影由自可,影個時唔知偽咪尐人唔見人影自己又唔影呢,突然係亞莎影緊個時,有10多個人又一齊搵自己個姓,搵到就一齊影,又會咁既?!真係瘦田冇人耕,耕開有人爭呢!

dsc09160_resize.JPG 史迪都搵到自己個姓呀!哈哈∼∼

係酒店叫的士去水立方同鳥巢,不過原來周圍都未整好,所以夜晚根本睇唔到鳥巢,水立方都仲好尐,夜晚會著燈,可以睇得清楚尐。但係因為冇賽事,所以唔開放比人入去參觀,唔好彩呢!

dsc09187_resize1.jpg dsc09190_resize.JPG

去完之後,的士司機介紹亞莎佢地去食毛家飯店,記得莎媽話過好味,就去試下啦,真係好好味喎!叫左一個粉絲加一個排骨,好好味呢!呢個的士司機真係好好人,車亞莎佢地既影水立方同鳥巢,帶亞莎佢地去最好既位置影,仲停車熄匙等亞莎佢地,叫亞莎佢地慢慢影,影完再車去第二個位再影,佢真係好好人呢!亞莎不得不係呢度幫佢賣個廣告先得呀!

dsc09229_resize.JPG dsc09399_resize.JPG

【北京自由行-Day2】

 | April 5, 2008 23:16

4月5日 星期六 晴

今日一早起身,先落左下面食早餐(包埋架嘛),不過唔知搞咩,竟然要等位?!有冇搞錯?負責人話因為今日有團,所以咁多人喎,又會咁既。不過都有幾多野食既,算唔錯呢!

dsc08649_resize.JPGdsc08647_resize.JPG

食飽就出發去故宮啦,睇好地圖,好方便,坐地車就搞掂。不過好多人,因為由今年起,清明都係中國既假期,所以去到天安門已經迫到好似行年宵咁呀!誇張呢!只係排隊買飛入場條隊都長到嚇死人呀!買左飛快快入場(不可不快,因為公安會不停咁叫你向前行,行快尐咁既)。入到去就冇出面咁多人,不過人都唔少,可惜有好幾個館都正係番新緊,所以冇得睇呢!不過都唔緊要,都有好多好野睇既!亞莎佢地仲比多10蚊入左珍寶館,都真係值得架,比多10蚊,少好多人呢! 😛 哈哈∼∼

dsc08663_resize.JPGdsc08676_resize.JPGdsc08788_resize.JPG

亞莎佢地快行都行左成3個幾鐘,唔係因為有尐館封左,可能要行一日呢!不過都係尐「古董」好睇,睇得出以前尐皇帝幾浪費,咩都鑄「金」既,誇張!行完當然順路睇埋人民英雄紀念碑、國家博物館(封館-擴建工程)、人民大會堂、毛主席紀念堂等等,天安門廣場果然係大,大到點行都行唔完咁!真係好厲害!

dsc08917_resize.JPGdsc08929_resize.JPGdsc08931_resize.JPG

之後就去左大柵欄個邊,食個晏同去北京老字號「北京同仁堂」啦。亞莎佢地去左食「全聚德」,出名食北京鴨,不過佢地尐鴨比香港既鴨細,亦比香港既鴨瘦,唔錯唔錯呢!佢已經係比一般既食肆貴,但係都好多人食呢!食完就去同仁堂同埋天福茶莊,真係幾好味。仲去左奧運紀念品專門店買左尐手信咁,OKAY 呀,開心開心!

dsc08949_resize.JPGdsc08954_resize.JPG

去完都已經夜了,又去返王府井,不過今次早去到,先行下王府井大街,同埋行左王府井書店,6層高,好多野買,不過而家香港好多上樓書店都可以買到大陸出版既書,所以就無謂搬餐死呢!

dsc08972_resize.JPGdsc08976_resize.JPG

今次先去東華門夜市搵野食,真係好多野食喎,只係你敢唔敢食既啫。亞莎見好多外國人都敢食,亞莎就唔敢了。只好影下相大家睇下算了!不過亞莎都有食野,食左一粒粒既麵,8蚊一碟,都唔細架,味道好好味,少少辣,唔錯唔錯。個廚師仲叫亞莎同佢影合照添呀,亞莎冇呀,只係影左個檔口就得啦。哈哈∼∼∼

dsc09006_resize.JPGdsc09004_resize.JPG

食完再返左去王府井個邊,再食左一個亞莎前所未食過咁「難」食既小籠包,又唔熱既,真係難頂!不過個牛肉麵就幾好味既,冇咩牛肉架,但係個麵都唔錯。但相比尋晚個刀削麵既話,輸左九條街啦。

【北京我嚟啦-Day1】

 | April 4, 2008 23:07

4月4日 星期五 清明節

今日雖然係星期五,但係係難得既假期,亞莎同 Ella 兩個今日起程去北京啦!亞莎未去過呢!今次要多謝 Ella 因為佢抽到雙人3日2夜 Package,湊埋亞莎,亞莎先有得去咋,每日補八舊水就變成4日3夜既北京之旅啦!Yeah! :mrgreen:

今日係晏晝機,所以可以慢慢食野先出發!約左 Ella 一點係機埸等,Check 埋 in 再去飲個茶先上機,讚呀!

dsc08573_resize.JPG

上左機,唔爆喎,可能係下晝機既關係吧!3個半鐘好快就過,上去唔使15分鐘就先嚟一個 refreshment,過多30分鐘左右就食晏(佢又話冇野食既,突然有野食,覺得賺左)!之後再睇下 duty free 咁就到!北京亞莎來也!

出到機場,新機場果然唔同呀!好靚好乾淨同埋最緊要係尐工作人員好有禮貌,呢個真係令亞莎對佢地改觀呢!由於亞莎住個間酒店比較近機場(近奧運場館),所以直接坐的士 instead of 坐機場巴士,連埋個個咩費,都係 RMB80,OK 啦!其實去到都成7點架啦,所以搞好野都出去行下,見都唔早,就去王府井,順便計下行去地鐵同坐出去大約幾耐,睇下聽日幾點出門口去天安門同故宮嘛!

dsc08588_resize.JPG

行下地鐵都唔係話好遠,一條直路,大約10分鐘左右啦,都可以既!出到去王府井個度好多人,亞莎同 Ella 兩個行下睇下有咩買同食,都好多呢!只係你敢唔敢食囉,真係咩都有得食架,好誇張呢!

dsc08646_resize.JPG dsc08621_resize.JPG

Bad Behavior has blocked 239 access attempts in the last 7 days.