Archive for the '200807 英國環島頭痕行' category

【UK-D16: Way back home】

 | July 22, 2008 23:01

7月22日 星期二 晴

好玩既日子真係過得快,今日就要返香港了。起身執好哂所有野,就出發落番倫敦啦。先去左 Wetherspoon 食個早餐,之後就出發啦。兩個多鐘既車程,去到還車時間都啱啱好,再去到機場都時間尚早,所以 Check 完 In 同大口係餐廳飲杯野,睇下相先再入閘。再見啦英國,再見啦大口,希望大口可以快尐搞掂哂尐野快尐返香港啦! 😳

【UK-D15: Matlock Bath-Nottingham-Chesterfield】

 | July 21, 2008 23:42

7月21日 星期一 晴

今日都係天晴,仲係好囇個隻添,正呀!今日係最後一日既行程啦,因為聽日就要返香港了...開心既時間真係過得特別快!大口今日帶亞莎去 Matlock Bath,個隻有 Cable Car 同埋睇石既,好靚架之前睇相。去到天氣十分好,亞莎同大口坐係路邊,一路囇太陽一路食 fish & Chips 呢!一尐都唔凍,真係舒服。食完就行去坐吊車啦,因為上去睇個個 Cavern 要坐吊車先到既。係英國坐 Cable Car 都係第一次咋!感覺好似怪怪咁,又唔似去海洋公園,所以有尐唔知點,不過都好斜既個吊車,上到去望番落嚟真係好靚呢!

Abraham Cable CarMatlock Bath

之後大口同亞莎就入個個 Cavern 啦,有導遊架,因為入面好黑又濕又跣架啦。亞莎都係跟住大口,跣都有佢頂住嘛,哈哈∼∼∼不過真係好得意呢!入面尐石頭有獅子頭,大象,恐龍等等等等,係咁啱得咁翹定係咩呢,都冇人知。落左嚟再係下面條行度行下,囇下太陽先再出發去 Nottingham,因為都好近既,所以入左去 Nottingham Castle 度睇下 Robinhood,係呀,就係 Robinhood 既所在地囉。之前莎哥帶亞莎嚟個時已經係夜晚,所以冇入過去呀,個公園都好靚呢!行左一陣尐鋪又係時候休息,大口問亞莎想食咩,亞莎就揀左去亞莎未去過既 Chesterfield 度食 Thai,係又係 Thai 呀!哈哈∼∼

Nottingham CastleRobinhood

好在有嚟咋,呢度比亞莎既感覺好似去左泰國咁呀!裝修得好靚,連尐 waiters 全部都係泰國人嚟,感覺好特別。尐野都好好食添呢,用嚟做今次旅程既最後一個晚餐真係適合不過呢!亞莎真係要多謝大口帶亞莎去左咁多地方玩呀,15日嚟既揸車辛勞真係辛苦哂啦!

Siam Corner - ChesterfieldSiam Corner - Chesterfield

【UK-D14: York】

 | July 20, 2008 23:24

7月20日 星期日 晴

今日終於都晴天啦!咁多日都落雨真係掃興呢!一起身,大口帶亞莎去一間叫 Red Lion 既野度食晏,佢話好出名,平日要 book 既,撞下手神睇下有冇位,雖然坐係個角落個度,不過好過冇位吖!同埋尐野真係好好咪呢!大口話呢間野攞獎架!今日既行程又係比較輕鬆,只係去 York 之後夜晚就返 Sheffield 同 Ruby 慶祝生日。

Red Lion - SheffieldYork Castle

去 York 唔使一個鐘好快就到,去到就係 Town 行下,原來大口以為亞莎未嚟過,其實嚟過啦,係莎哥帶亞莎去架。哈哈∼∼不過去過都可以再去啫!先係 Caastle 附近行左一陣,之後就行最出名既 Shamble 去 Minster 個邊睇 Cathedral。Shambles 個度有好多小店,賣尐野都好得意架,其中係 Fossgate 個度有間 Miniature Scene,亞莎話左一定要去,因為佢有好多 Miniature 賣架,不過亞莎買唔到啦,買左又帶唔到返香港既,所以都係算了。睇到已經好開心啦!

York MinsterYork Minster

之後再同大口落左河邊,坐係度囇下太陽嘆杯野飲,哈,好舒服呢!因為今晚約左 Ruby 7點,都唔可以太晏走呀,行多一陣都返去了。

YorkYork

返到去,放好野就去 Ruby 度啦,上到去人人都到齊了,除左大口,Ruby 同 Ben 之外,亞莎當然係個個都唔識啦,不過一次生兩次熟,佢地個個都好 nice 呀!大口仲聽到亞莎同 Ruby 尐朋友不停不停咁講國語話唔知原來亞莎尐國語咁勁,邊係勁,只係平日會講就識架啦。

食完野,再落左下面飲兩杯,因為都未到12點呀,亞莎佢地同 Ruby 玩到12點先走,壽星女,生日快樂呀!

Happy Bday Ruby

【UK-D13: Windermere-Amberside】

 | July 19, 2008 23:06

7月19日 星期六 驟雨

今日就係離開 Scotland 既日子了,今日會去亞莎次次都去唔到既地方,Lake District 啦。原來 Lake District 都分好多 parts,大口就話最出名係 Windermere(因為個湖係最大既),咁就去啦!不過因為車程既關係,係 Dumfurline 食左野先,又係附近個餐廳度食,今日可能係星期六啦,比之前多人呢!食完就出發啦!

去到已經見到好多人啦,先搵好位泊車(唔使錢呢),就落去行下。沿住湖邊行有好多天鵝呀,雀仔呀咁,好得意呢!尐天鵝唔怕人架,反而係亞莎怕佢地呢!哈哈∼∼∼大口同亞莎出海遊船河,好靚呢個湖,船程 45 分鐘,有講解既,都幾好呀!不過坐坐下落雨呀!好在唔係好大,所以亞莎同大口都冇落到下面,仍然坐係上面睇風景!

WindermereWindermere - Boat trip

遊完都要食野啦,去左附近間餐廳食,有少少似自助咁,比左錢,排隊,揀野食,菜就由你自己鍾意食幾多就拎幾多,當然亞莎唔會拎多啦,費事自己食唔哂嘛,大口見到亞莎隻碟話「咁少既」亞莎話「啱架啦,唔係又食唔哂」,最終亞莎當然係食哂啦,而大口就話「第一次見你可以食清哂隻碟既野」(咩喎!) 😛 而且 Lake District 仲係 Peter Rabbit 既出生地添呀,所以周圍都有好多 Peter Rabbit,大口都買左一隻比亞莎呀!多謝呢!

Peter RabbitAmbersideAmberside

食完大口話帶亞莎去另一度,話個度都好靚架,叫 Amberside,都係湖區呢,個度尐小屋又同 Windermere 個度個尐唔同,感覺係 Windermere 個度尐人有錢尐,Amberside 個邊就平民尐囉,兩個地方都好靚呀!睇完呢又係時候返屋企啦,因為再返 Sheffield 都要兩個鐘呀!今次之旅真係又上天又下海啦!

【UK-D12: Edinburgh】

 | July 18, 2008 23:54

7月18日 星期五 驟雨

尋晚返左落 Edinburgh 之後,今日都係留係 Edinburgh,係市入面行下睇下慢慢咁享受。由於今日係星期五,亞莎當然係做完野先出門口啦,差唔多12點先出去,一落到 Town 當然又係醫肚了。今日食亞莎平時好少食既 Jacket Potato,點解少食,因為亞莎一食薯就會好「頂住頂住」咁架。

之後就去行下,今日個天都唔係話太差,有時落下雨有時又有尐太陽。亞莎同大口今日去左 National Gallery 度睇,尐畫好得意既,明明係無價,但係又冇玻璃鑲住架喎,只有一條條既紅繩圍住,可能英國人始終都係講個「Honesty」啩。睇完又去行下手信街,終於都比大口買到佢想買既毛巾,因為佢明明記得呢度平尐喎,所以係 Inverness 又好,Glasgow 又好,佢都唔買,話明明 Edinburgh 係平尐,又真係喎,平3鎊喎,又會記得既佢?!

跟住就去下 pub 都飲下野,傾下跳下(明顯係大口跳,亞莎都唔跳既),佢玩得好開心呀,仲將亞莎隻手撞埋牆,痛死人咩!(第二日手指係「魚」左一大塊既),算啦,佢都唔係有心既!不過好搞笑係,夜晚有人賣花,大口買左支比亞莎,問題係到左第二日,亞莎同大口先知係假既(個度實在太黑呢),哈哈∼∼∼

Writer MuseumCity Hall

【UK-D11: Inverness-Urquhart Castle-Aviemore】

 | July 17, 2008 23:38

7月17日 星期四 驟雨

今日係亞莎等左好耐既日子啦!今日就會上 Inverness 去 Loch Ness 睇 Nessie 啦!Nessie 係乜家科,咪係尼斯湖水怪囉,哈哈∼∼∼

由 Stirling 上去都要成3個鐘,所以亞莎先係 Stirling 停一停,等大口冇咁辛苦嘛(大口乃司機哥哥也)。上到去好好天呀!(亞莎指 Inverness 個 Town),先去食野,亞莎叫左個 Ribs,點知超大個,唔使問,當然都係有一半自動過戶啦,亞莎邊食得哂先得架,大口已經成日話亞莎唔使食野架啦,但係咁大份,真係食唔哂架嘛!

食完係 Town 行左一陣,上左 Inverness Castle 睇左外邊(都係一樣,冇入去,因為唔知有咩好睇),之後就攞車出發去 Loch Ness(尼斯湖)啦!車程只有半個小時,點知落狗狗,點解咁架!

Inverness CastleNessie Visitor Centre

好在去到都細雨左,只有小雨。亞莎同大口入左個 Ofiicial Visitor Centre 去睇 Nessie 既記錄片,又買左尐 Nessie 既小手信比朋友,希望佢地鍾意啦。

之後大口仲車亞莎去左 Urquhart Castle 度睇,佢話個度睇 Loch ness 係最好既位置,果然喎!哈哈∼∼不過 Castle 是日不開放呢!但明明見到有人入左去架喎,奇怪!

Urquhart CastleRainbow

到亞莎佢地走個時,突然又落大雨啦,係 Loch Ness 既湖面上面出現左一道好靚既彩虹,亞莎即刻許願啦!同大口一齊見到架嘛(雖然今次成個旅程都已經一齊見過好幾次),好開心呢!

之後大口又帶左亞莎去 Aviemore 既 Cairngorm 度,諗住睇雪,亞莎話7月邊有雪架,當然上到去真係冇雪啦,不過都好凍呢!加上又有小小雨,感覺真係好冬天呀!原來 Cairngorm 係滑雪聖地,不過時間唔啱呢,冇法啦!

去完都差唔多時間要落番 Edinburgh 啦,因為又要三個鐘車,所以係時候啦。返到落去都天黑了,亞莎同大口停左係 Edinburgh 個 Town,去左一間叫 Spirit of Thai 度食,好好食又好靚個度。多謝大口!今日好開心呀!

Aviemore - CairngormSpirit of Thai - Edinburgh

【UK-D10: Glasgow – Stirling】

 | July 16, 2008 23:05

7月16日 星期三 陰

經過尋日既落雨天,今日好多了。今日起身出發去 Glasgow,亞莎同大口都未去過呢!去到,一個小鎮咁,好舒服,好古舊。可能同佢有個出名既 architect – Charles Rennie Mackintosh 有關。

一去到先去左 Princes Square 醫肚,一人一個 Panini 先,之後就周圍行下,好多建築都好靚呀,大口就比較鍾意呢度,亞莎呢就比較鍾意 Edinburgh 啦。

之後行左去 GOMA,好出名既 Contempory Art Centre,同埋個 Royal Exchange,George Square 加 Chamber 都好靚呢!

Princes SquareGOMAGeorge SquareChamber

行左一輪,亞莎同大口就係好出名既 Buchanan Street 度坐低嘆個 Tea 先再行。再去 Stirling,因為今晚係住係 Stirling 架。去到 Stirling,上左去個 Castle 望下,都幾靚架,不過冇入去,因為都差唔多 Close 啦,所以亞莎佢地只係影下相,行下就返去。返番去 Glasgow 點都係多人尐既,再食個飯,飲杯野都走了不過,因為又落雨,又凍,再加上入夜有尐恐怖,都係打道回酒店了。

Old Jail - StirlingStirling Castle

【UK-D9: Edinburgh Castle】

 | July 15, 2008 23:11

7月15日 星期二 雨

尋晚玩到咁攰,今日一早就出發上 Scotland 啦!哈∼∼不過又係一開車就落雨... 😳

沿途行都落下雨停下雨,點知去到一個位有好多人停左係度,原來係 Scotland 同 England 既 border 喎。咁大口都冇放過,返轉頭停低影番張相先...哈哈∼∼因為一舊大可上面,一面係刻住 England,而另一面就係 Scotland 啦,感覺真係好得意呢!

之後就向 Edinburgh 進發啦!

去到先醫肚啦,跟住就係去亞莎上次想去,不過去唔到既 Edinburgh Castle 啦!好多人呀!排隊買左飛就入場啦!真係有幾多野睇架喎,不過亞莎覺得,好似 England 既 Castles 靚尐囉!

行左個圈(都唔細架),其中有個監獄比亞芽個感覺就好似香港既 Victoria Prison 啦,上次香港開放日亞莎都有去架。果然係好英國呀下。其中一個館亦都展出左女皇同皇帝既權杖同皇冠,真係好靚好多珠寶鑲左係上面,貴族既感覺真係一眼就望得見!

再係個 Town 行多一陣都返酒店,可能尋晚太夜啦,今日都有尐攰,聽日又要去 Glasgow 喎,所以返番去 Dumferline 放低野,就係附近既 Pub 食野,尐野都幾好味架喎,唔錯唔錯!

Scottish Border

Bad Behavior has blocked 146 access attempts in the last 7 days.