Archive for the '201105 亞莎龜姬華東行' category

【上海蘇杭莎嚟啦-Day4】

 | May 17, 2011 14:48

11年5月17日 星期二

上海【翰林畫園、南京路、上海老街、新天地廣場】→香港 【Day 4 相集

今日係呢個行程既最後一日,反而係最自由既一日,早上先去左翰林畫園,睇個位大師畫畫,可惜佢尐野貴到飛起,而且不太興趣。之後就係去左食飯,今日都唔錯,只係食煙既人太多。食完就係外灘自己活動,亞莎同龜姬先係外灘行左一陣,就行入去個條南京路,不過都係冇咩野睇,亞莎同龜姬就入左去和平飯店飲 Tea 啦!嘩正呀!好靚,基本係食環境,服務一流,都唔太貴,好可以接受呀!嘆完 Tea 就差唔多集合啦,又去下一個景點,就係新天地啦。不過對亞莎嚟講冇咩特別,只係食野飲野既地方,特別就係佢既裝修又係古色古香囉。又係自己活動,亞莎同龜姬又係行行行行行,行埋去太平洋百貨,不過佢尐野唔平,貴過香港好多,明明香港賣38,佢賣46仲係人仔,咪搞啦。行完都上車,差唔多時候去機場啦。

去到機場,亞莎佢地係上海食埋最後一餐就同上海 Say Goodbye 啦∼∼上海,有機會再見啦∼∼∼

【上海蘇杭莎嚟啦-Day3】

 | May 16, 2011 14:45

11年5月16日 星期一

杭州【西湖曲院風荷、龍井茗茶】【桐鄉(中國菊花之都)】─上海【城隍廟、夜遊黃浦江】

Day 3 相集 Part 1】【Day 3 相集 Part 2

今日起身就去左西湖邊,一落車就已經係金庸茶館,不過亞莎佢地並唔係去嘆茶,而係去隔離既曲院風荷,不過而家並唔係時間睇荷花,所以冇得睇。但都可以睇到中國三大名石之一,之但係,唔明有咩好睇。睇完去左飲茶,杭州出名龍井,可惜吖,唔啱亞莎口味喎∼∼之後就去左錢江酒樓食晏,唔錯架,都幾好味呢!食飽就出發過上海個邊,中途係桐鄉停左一停,個度可以飲菊花茶呢!亞莎同龜姬都買左尐八寶茶,好好味架!哈哈∼∼∼

之後又長途車去上海啦。過到上海先去左城隍廟,去城隍廟唔係去求簽架,係食野同買野架∼∼∼哈哈∼∼∼亞莎同龜姬第一步就去左食「南翔饅頭店」食小籠包,不過亞莎覺得,鼎泰峰好味呢囉!食完就行街,再買左小林煎餅做手信呀!行完再去左食湯圓呀,一碗湯圓兩份食,正呀!食完就差唔多集合啦,就去食飯。今晚食飯個度好靚呀,超正!古色古香既呢,但係由於頭先食得太多野,亞莎同龜姬都唔係好食得落呀∼∼哈哈∼∼

食飽飯就開車去準備夜遊黃埔江啦,上海既夜景真係好靚呀,同香港有得比,只係香港再「密集」尐囉。亞莎好鍾意佢個個東方明珠塔,反面個個國金亞莎覺得麻麻地,都唔靚既。呢個一個鐘既船河,搞到亞莎凍病左∼∼∼返到酒店係下面買左個布丁,食完睇陣電視都已經瞓著左啦∼∼∼哈哈∼∼∼

【上海蘇杭莎嚟啦-Day2】

 | May 15, 2011 14:43

11年5月15日 星期日

蘇州【絲綢廠、蘇州博物館】─著名江南水鄉【烏鎮】─杭州【遊西湖、花港觀魚、杭州之夜】 【Day 2 相集 Part 1】 【Day 2 相集 Part 2

今日一早起身,因為8點就要出發啦。先落去食個早餐,掂掂掂呀!好多野食呢,但尋晚就瞓得麻麻地啦,係亞莎想瞓個時,竟然聽到有細路大喊囉,係真喊好假既都好啦,亞莎都同自己講瞓啦瞓啦∼∼∼

開車既第一個地方就係去絲綢廠,當然亞莎係一尐興趣都冇啦,仲咁貴呀!亞莎一年到晚都係冷氣被一張架咋!不過亞莎都買左一把扇比莎媽呢!係其他人睇既同時,亞莎同龜姬問准行出去影另外一個塔(唔記得叫咩,只記得係一個人為左紀念佢媽媽而起既,而呢個塔係舊區嚟講係最高既一個塔,冇任何既樓或者大廈會比佢高,呢個係舊城既特點!),之後就開車去蘇州博物館啦,好多人啦!不過貝聿銘真係好勁,係有限既地方同高度都起到呢個博物館呢!而且佢個入口睇出嚟好似一隻怪獸架!就連係排隊既同時,「高低音」都可以買到野食,真係好掂囉!哈哈∼∼入到館入面其實有好多野睇,仲好涼添,不過原來唔係冷氣嚟架,係地下天然涼風,好勁呀!亞莎佢地睇左一陣都要走了,因為要去下一個景點,就係一個水鄉-烏鎮啦。

去到烏鎮可以坐小船遊一陣,入面既所住既二百幾人都係老人家,佢地既平均年齡都好高,過百架。好勁!亞莎佢地都睇左入面既幾個館,好得意呢!仲買左小小手信呢(所謂既手信都只係限於自己既,因為尐野一尐都唔平呀)。行完烏鎮都已經出哂汗啦,上車休息一下因為又要過杭州啦。去到杭州先醫醫個肚,今晚個餐都好好味呀!唔錯,而且仲見到有三對新人結婚呢!食完亞莎佢地未走架,再去睇 show,一個叫杭州之夜既 show,開頭都唔知係咩,不過值得睇呀!好精彩,好緊湊架!尐人好勁,有種睇馬戲既感覺呀!

【上海蘇杭莎嚟啦-Day1】

 | May 14, 2011 23:39

11年5月14日 星期六

香港→上海/蘇州 【Day 1 相集

尋晚超夜瞓,不過今早一早起身,因為要去機場啦嘛。亞莎去到龜姬已經到左啦,亞莎仲諗住自己早尐,點知龜姬話巴士仲快,比平時快左半個鐘呀!不過都好在,中旅尐人都已經到左,所以比左機票亞莎佢地就可以自由活動,亞莎同龜姬就入閘去食早餐。不過入閘有少少阻滯,因為龜姬唔記得左佢自己有樽水呀!哈哈∼∼不過個個人好好人,話飲唔哂可以幫龜姬倒左佢,不過當然龜姬係飲哂佢啦。之後就入去食早餐。亞莎佢地都係大家家食個早餐就算了,再行陣就入閘,不過係行陣既時候出事呀!比亞莎係ZARA買左兩條裙呀!不過好笑既係,有一條裙,佢有兩個價錢,一條係平一百架,亞莎當然係拎平個條去比錢啦(亞莎同龜姬真係對過有冇分別架),而佢真係收個個價錢呀!哈哈∼∼∼

之前就上機啦,不上機之前亞莎聽到有人唱歌呀!有一對夫婦係度唱大戲,仲好大聲,好可怕,點知,佢地係同團架∼∼∼

上到飛機,有個婆婆坐亞莎佢地隔離,都係同團架,呢個婆婆好得意好好人身體仲好好添呀!而亞莎同龜姬都同佢地做左朋友呀!婆婆今次係同個女、新抱同孫仔一齊去旅行(孫仔都唔細架啦,亞莎佢地叫佢做大隻仔,因為佢真係好大隻!)哈哈∼∼∼落左機就出發啦,不過本身話今日去杭州先既,但行程有變,先去蘇州呢!第一站亞莎佢地落左車買尐尐野食,見到有茶葉蛋呀,買個嚟食先!好味呀!哈哈∼∼之前就再開車去金雞湖啦,個度個個蘇州鳥巢都好靚架,入面有好多人係個度睇戲既呢,大陸睇戲都唔平架,同香港差唔多價錢呢。

睇完之後就去食飯了,因為都已經黃昏啦,今晚去左食一家叫「吳地人家」既飯店,佢都好出名吓架,而且野食都好好味呢!不過亞莎除左同梁婆婆佢地一家坐之外,仲同埋龜姬所叫既「高低音」同枱呀!佢地兩個既食量超驚人,好可怕!而且,高音應該係有尐撞聾既,佢把聲係遠遠都會聽到架!好可怕呀∼∼食完飯就飯酒店,今晚係住係舊區,地方好古色古香架。行出去都有尐野行下添!大隻仔佢地知道亞莎佢地想行,就話不如一齊(咁又係,有個男仔好尐嘛),咁亞莎龜姬大隻仔 Helen 同 Kitty 就一齊出發啦,不過都冇咩野睇既,大部份都係賣衫衫衫,因為蘇州絲綢出名嘛!不過亞莎同龜姬行便利店見到有 barcardi Breezer 呀,即買兩支嚟飲呢!仲叫店員幫亞莎佢地開左先呢,唔係唔通真係用口咬咩!哈哈∼∼大隻仔佢地就買左雪糕食呢!返去亞莎同龜姬沖個涼就慢慢嘆呢!開心呀!

Bad Behavior has blocked 239 access attempts in the last 7 days.