Archive for the '200909 突如其來澳門行' category

【突如其來澳門行 Day 2】

 | September 6, 2009 23:59

9月6日 星期日 晴

尋晚返酒店沖完涼睇埋電視都成3點幾,今日9點起身,落去食早餐就出發!今日去邊呢?就係松山(研一? 😆 )燈塔同埋教堂啦,嚟左澳門都有唔少次,從來都冇去過松山燈塔呢!今次就去啦!亞莎佢地先打的上燈塔,點知∼∼∼司機叔叔搞錯左(囧),車左亞莎佢地去「澳門博物館」囉! 🙄 咩事呀叔叔!差好遠喎!搞到亞莎佢地行番落山,再搵車上!終於都去到啦!嘻嘻!不過先去左個防空洞,睇完再向上行搵燈塔,一路行又問下人,搵到了!上到去仲有人影緊婚紗相呀!今日咁熱真係辛苦哂囉!不過天氣就超好囉! :mrgreen:

行完個燈塔(因為唔開放既),就沿路行去坐「全球最短」既纜車「松山纜車」啦,單程位位2蚊,抵,同坐叮叮一樣! 😛 唔使點等(因為冇咩人),不過去到纜車站,見到一樣野,係所有人一見到都要影相,就係佢個「顯示器」寫住「35C」(囧),怪不得咁熱,熱死人!亞莎成個身都濕哂! =____="

坐到車落左下面二龍喉公園,再到「玫瑰咖啡室」嘆杯野先,好熱!再計劃一下行程。好,去影相!去左藝術館對出空地,個度幾靚架!仲途經「孫中山紀念館」添!之後再去左「禮記」嘆個好耐都冇食過既雪糕三文治!加價加到 8.5 都幾貴!之後再睇完手信就向教堂進發!亞莎佢地本身經過左一個教堂,但係唔係亞莎佢地想搵個個喎,而係聖彌額爾小堂,不過都好靚架!亞莎佢地先行去大三巴,今日唔知咩事,有一班「印度影星」係度賣廣告,佢口食住一個椰撻,再手拎住兩個放係眼,成個傻佬咁!好好笑! 😆

幾經辛苦行到去個聖安多尼堂(係因為人多),佢係澳門最古老既教堂嚟架!之後就向「Hard Rock」進發!其實就係威尼斯人隔離,不過都幾靚叫做,同埋入面都幾多野睇!魚世界囉!亞莎仲撞到舊同學,勁呀!係 Hard Rock 又坐抵飲杯啤先,主力係因為真係出得太多汗 =_____=" 不過 Hard Rock 真係有尐誇張,佢一件 Tee 竟然要 788 蚊囉!亞莎買第二尐靚既都得啦!(囧)

之後再行返過去官也街,因為熊貓要買老婆餅!再去左咖哩全度食碗麵!之後係後街度行下睇下又過返去福隆新街,熊貓要買杏仁餅嘛!亞莎都係鉅記買手信,有 Order 架嘛!哈∼∼之後再去左 Wynn,因為熊貓想睇多次個 show 同埋去 MGM 買朱古力呀!咩都做哂,就返酒店 pack 好野走人!本身係十點九船,不過當然唔會咁夜走啦,八點二去到等八點半船,好好彩,亞莎佢地係最後兩個雙連位,之後都只有四個單丁位,所以澳門再見了∼

20090905-macau1_resize.jpg

【突如其來澳門行 Day 1】

 | September 5, 2009 23:59

9月5日 星期六 晴

今日起身,執好野就去同莎哥佢地飲茶,晞晞佢地過左嚟,因為晞晞要剪頭髮喎,仲話晞晞鍾意比人剪頭髮,好少小朋友鍾意比人剪頭髮既呢...

之後亞莎就向「澳門」進發啦!約左熊貓係碼頭等,有位就上船(因為熊貓要返學,預鬆左時間),去到都夜晚啦,酒店包埋自助餐,不過亞莎佢地食個快既,因為要去睇煙花,澳門有一連五個星期既煙花比賽,而咁啱今日係第一日呢,酒店有專車車去睇,不過返就要自己返,都冇問題吖! 😛

去到等半個鐘!都幾多人睇架,唔錯啦叫,唔似香港放煙花咁大型,不過叫唔錯!係一個 bonus 嘛!睇完先去左飲杯野先,木瓜奶吖唔該!之後又去左食鯪魚球,正呀!食飽要行下,行左去 MGM 睇熊貓花園,都真係幾靚架!影相時間!哈∼∼之後再過左去 Wynn,先係出面等左一陣,睇佢個噴水池 show,well 相比起 Vegas Belagio 當然小巫見大巫,不過叫做唔錯喎!冇諗過有得睇,又係一個 bonus,哈∼∼之後入左去 Cinnebar 飲杯野,一個好地方,感覺唔係澳門,似泰國!正!啤酒都唔貴,40 個大洋!仲有 nuts 送!飲完再去睇 Wynn 個個免費 show,熊貓話之前係「樹」嚟,而家係「龍」呀!幾靚既都亞莎覺得!係 MGM 仲買左佢既 limited edition 「幸運仔」(獅子扮熊貓),好得意呢!嘻嘻∼∼睇完所有野都返去了,因為已經一點幾啦∼∼∼囧

20090905-macau_resize.jpg

Bad Behavior has blocked 227 access attempts in the last 7 days.