Archive for the '200911 世界遺產土樓行' category
【世界文化遺產土樓群之旅-Day3】
Sa | November 30, 2009 23:59【世界文化遺產土樓群之旅-Day2】
Sa | November 29, 2009 23:59１１月２９日 星期日
原有行程：廈門∼漳州百花村∼絲綢店∼南靖縣船場土樓群∼田螺坑土樓
今日因為要去土樓，而土樓既路程遙遠，所以７點就起身 (morning call) 然後落去食早餐出發！落到下面都有尐團友到左啦。早餐有白粥、油條、廈門麵線、花卷、仲有尐炸菜、菜圃、魚干等等送粥添架！仲有豆漿，不過亞莎同五姑姐都冇飲呀，因為有自備「奶茶咖啡」啦喂！亞莎呢個茶怪冇奶茶點得架！落到佢團友們見到都「讚」呀！哈哈∼∼
好啦，出發啦！第一行程係「漳州百花村」，話明百花村就當然係有好多花架啦，車程大約一個鐘左右（不過有呢位亡命飛車司機，四十分鐘就去到啦），去到百花村！ 😯 呢個叫百花村嗎？似花墟多尐喎！不過算啦，都幾靚呢！獅子仔同史迪都影左相架！哈哈∼∼∼村中間仲有個超級無比巨大仙人掌，幾層樓咁高架！而亞莎佢地又見到有唔同顏色既仙人掌添呢！
好啦，下個地點啦，就係亞莎最想最想去既土樓啦！亞莎之所以知道土樓，係因為上年去北京既時候，係飛機上面睇到本雜誌介紹，亞莎一見到已經好鍾意啦！當然人地係坐直昇機去睇，亞莎就坐車啦！不過大陸直昇機嘛，亞莎覺得車反而安全尐囉！由百花村去土樓行程大約個半鐘，沿途已經見到唔少土樓架啦，不過唔算係土樓群，因為比較少，只有一、兩個咁。不過全程車見得最多既係咩呢？就係「香蕉樹」啦！幾個山頭都係蕉樹架！所以佢地話，當地買蕉，一蚊斤架咋，又大又好味呢！
終於去到第一個土樓，船場土樓啦！呢個土樓只有五十年歷史左右，亦都係冇咩賣野人係入面！似民居多一點。有個婆婆都好好客，請亞莎佢地飲茶呢！之後就出去出面農家飯店食晏啦。食完又再出發去第二個景點－「四餸一湯」之稱既田螺坑土樓群。不過土樓群一定要坐專車，所以呢唔係人人都去得，一定要比錢先入得架！去到先車亞莎佢地去觀景臺！好靚呀，亞莎最想見既四餸一湯就係眼前啦！當然亞莎都一定要影番張相先啦！嘻嘻∼咁又點會少得史迪同獅子仔個份呢！哈哈∼∼
好啦，影完相就出發，就係前往呢個土樓群，係可以入去參觀呢！去到，土樓好大好大呀！而且好多人添呢！有好多居民擺賣做生意添！不過真係值得去睇，去睇下點解七百年前，古人已經可以唔用一口釘都可以起到防禦十級地震既高樓！可想而知以前既人有多聰明！而且起一座土樓要三十年，起好個時個位人兄都可能老死了（以當時人既壽命）。
行呀行行左好多個土樓，每一個都好似好似樣，但每一個都有唔同既感覺。之後去到最後一個「中國第一奇樓」－「裕昌樓」。點解佢係奇樓呢？佢又被稱為「東歪西斜樓」，因為裕昌樓高五層，但佢既第三同第四層分別歪向東跟西方向。但仍有不少人住係入面架。佢都係文化遺產之一嚟。值得保留。
好啦行完都差唔多黃昏了，因為車程遙遠，今日既行程就差唔多。夜晚返到去食左個客家菜，幾好味架其實，只係中國人煮野真係好鍾意落油！仲要係好多個隻添！不過都好好味！去旅行就放肆一下啦。 😛 食完飯，導遊又帶亞莎佢地去夜遊，行街食野，同埋睇音樂噴泉同風景，返到酒店都差唔多十點了。聽日既行程比較短線，所以可以八點先起身呢！
【世界文化遺產土樓群之旅-Day1】
Sa | November 28, 2009 23:59１１月２８日 星期六 晴
原有行程- 香港 ~ 廈門 ~ 環島路海濱風景區 ~ 金門廚具店
今日起身，再執多次野，睇下有冇漏，冇啦就出發啦！因為坐黃昏機，所以先去機場飲茶（平時都會去既，少尐啦），再夠鐘就去集合。亞莎已經好多年冇跟團去旅行，對上一次已經係０１年去日本了。所以跟團真係有尐唔慣！
上機啦，一齊都安好，直到∼∼∼
落機後，所有團友都拎左行李，但有一位團友佢唔見左行李呀！唔會咁快唔見嘛！點知係等之際，愈來愈多人唔見行李既（其他團既），先發現，原來港龍唔記得將尐行李上機呀！仲係香港唔知做咩囉∼∼∼因為等之故，所以是晚行程都要順延啦。只係返酒店食飯同休息。不過都好既，聽日去土樓要七點起身呢！都係好好休息抖足精神，因為亞莎嚟福建廈門就係想去土樓咋！
Let me know…