【紅衣熊寶寶】
10:45 pm７月５日 星期日 雨
今日瞓到晏一晏先起身，之後都係係屋企食野冇出去。下晝係屋企 hea 下，hea 到咁上下就去惠康掃貨啦當然！今日有 double 印花嘛！嘻嘻。
買完已經夠印花換紅衣熊寶寶，不過亞莎唔記帶屋企個尐所以冇得換！返到屋企莎爸已經將佢個圖畫好啦，佢係度設計佢自己個電影櫃！唔錯架！亞莎仲諗到如果新呢個連係飯廳食飯都可以有電視睇！哈哈∼∼∼（發下夢先）
夜晚出去飯堂食飯！食完去玩八達窿日日賞，亞莎 do 到有５倍呢！ yeah ！之後莎爸再車亞莎去惠康換熊熊，不過大頭亞莎開心得滯，衝去惠康個時見唔到條柱，成個日撞左埋去！而家隻手超痛！（因為見到個時已經停唔切，自然反應用手頂嘛），熊寶∼∼亞莎好痛！不過比亞莎換到熊寶都好開心，雖然係痛左尐∼∼∼ 
【小童童】
11:48 pm７月４日 星期六 雨
今日８點幾又醒左，亞莎當然又係叫自己瞓啦，因為尋晚都成３點幾先瞓架啦，有咩理由咁早醒！不過１０點都醒了，可能因為落好大雨啦。
瞓醒沖個涼先，因為發左惡夢，成身濕哂呀！等到差唔多時間就落去，因為今日約左亞芝亞霆同丁翹伉儷一齊去探小童童嘛！食完野就出發！亞莎第一次去嘈嘈度呢！眼見個個朋友唔係結左婚就生左仔囡，感覺好得意呢！真係歲月催人老呢！見到小童童就好似見到亞恆咁，一模一樣樣架！哈哈∼∼
上去傾下講下咁時間過得好快，亞莎佢地５點幾都走了，因為亞翹佢地有尐事，亞莎都約左大口呢！先出去行左一陣大口都到了！食飯行陣都走了！本身上左去亞貓地攤，不過佢地既效率實在慢慢慢慢慢到不得了呢！所以，亞莎佢地等唔到都走了（只係叫左兩杯野飲，但係等左半個鐘都未有），返屋企吧了∼∼
【史上最強】
11:41 pm７月３日 星期五 晴
今日下晝 Ben 少請食飯，因為佢下個星期就 last day 啦，又一個走了，不過唔同啦，唔同部門，搵工都唔同，希望係新工做得開開心心！
今日 Ben 少請亞莎佢地去鴻星，亞莎同蘭尼都係諗住飲茶，點知？！？！？！佢真係史上最強啦！有一人一盅雞燉翅！仲有鮑魚添！亞莎佢地見到都呆左！聽佢地講仲有雞有魚添呀（亞莎同蘭尼要開馬拉松會嘛，早左走），仲話有美點雙揮呀！勁到你暈！Ben 少仲帶埋佢女朋友出嚟添呀！亞莎尐同事仲笑話其實今日佢係想帶亞莎佢地去試菜喎，哈哈 
勁！
放工都已經８點幾，蘭尼聽日要早起，所以行過去四小龍個邊食飯就算了！去左太興，亞莎叫左個叉鵝瀨，蘭尼叫左個排骨炒河，超飽呀！食完行左個圈仲去左麥叔叔食個雪糕新地添！哈哈∼∼
【睡衣熊寶寶】
10:28 pm７月２日 星期四 晴
今日下晝亞莎成班過左去食麥叔叔，因為亞莎想去惠康換熊熊嘛！個個都話去喎，咪一齊去囉！嘻嘻∼∼未試過成班一齊行過去食呢！ 
食完亞莎即過惠康睇下有冇得換，有呀！亞莎係補錢換既，補錢仲可以拎多個印花，搞笑！哈哈∼∼換完就返公司啦！下晝開會，點知亞莎既老闆今日又發表佢既偉論，話今個月要同大家考試喎！仲要考成兩個鐘呢！唉，而家咩年代呢？！返工返到咁真係唔知佢想點囉！
放工肥叔叔突然話不如出去行下，好啦見佢去完旅行返嚟都未見過佢（其實，佢尋日先返香港，哈哈∼∼），都係同一個地方，因為佢想睇玩具嘛！大家都冇咩食野，只係掃下街咋！掃完街都冇咩胃口啦！有人好囂咁話今日下晝食日本野食得太飽喎，去完旅行屋企又好多零食咁話！串咀到爆！ 
不過見佢開心都好呀！做人為咩啫，最緊要開心嘛！等亞莎諗下今年去邊樹旅行先！嘻嘻∼∼
【首次入馬場】
10:44 pm７月１日 星期三 晴
今日７點幾醒左，同平日返工時間係一樣呢！！明明連鬧鐘都冇校架啦，都醒！ =____=" 當然叫自己再瞓啦，哈哈∼∼
起身搞下呢樣搞下個樣就落去會合，今日大口爸大口媽同大口話帶亞莎入馬場呀！係呀，亞莎未去過架！因為屋企都冇人賭馬既！不過未去過同埋話今日係今個馬季最後一日喎！咁就去啦。大口爸係美孚接埋大口同亞莎向沙田進發！去到已經跑完第一場，當然亞莎佢地仲有野食啦！不過原來今日每人既最低消費係４００蚊呀！ 
唔知原來係咁貴架喎！不過叫左４個餐，野飲任飲呢！唔錯唔錯！大口爸就場場買下，先輸後嬴打個和囉。 亞莎完全唔識，不過都幾得意既！睇埋最尾一場仲有獎頒添架！比亞莎見到何生拉頭馬呢！而佢隻「爆冷」仲攞獎添呀！
睇哂最後有泳兒同林子祥唱歌同送禮物呢！亞莎佢地睇哂先走，之後坐車過番麗豪酒店下面飲杯野，因為大口爸有支酒係個度，話飲埋佢喎！亞莎佢地四個仲玩大話骰添呀！好好笑呢！飲飽就過左去龍華食飯，大口未去過喎！亞莎之前去過一次囉。最出名係乳鴿呀！是晚多謝大口請食飯呢！嘻嘻∼∼食飽就過番河畔個邊攞車就返屋企啦！今日好曬好熱，不過都幾好玩既呢！
